പിറവം: നാടിനെ നടുക്കിയ മോഷണസംഘത്തിലെ രണ്ട്‌പേരെ കൂടി പോലീസ് കസ്റ്റഡിയിലെടുത്തു. തമിഴ്‌നാട് സ്വദേശികളായ നാഗരാജ് മുരുകന്‍(27), നാഗരാജ് സുബ്രഹ്മണ്യന്‍(30) എന്നിവരെയാണ് മലപ്പുറം കൊണ്ടോട്ടിയില്‍നിന്ന് പോലീസ് പിടികൂടിയത്.
കഴിഞ്ഞ ജൂണ്‍ 30നാണ് പിറവം പട്ടണത്തിലും പരിസരപ്രദേശങ്ങളിലും രാത്രിയില്‍ നാല് വീടുകളില്‍ കവര്‍ച്ച നടന്നത്. പിറവം നിരപ്പില്‍ മകളുടെ കഴുത്തില്‍ കത്തികാണിച്ച് ഭീഷണിപ്പെടുത്തിയാണ് അമ്മയുടെ ആഭരണങ്ങള്‍ കവര്‍ച്ച ചെയ്തത്.
പിറവം പോലീസിന്റെ മൂക്കിനുതാഴെ നടന്ന സംഭവത്തില്‍ പ്രതികളെ കണ്ടുപിടിക്കാന്‍ കഴിയാത്തതില്‍ പോലീസിനെതിരെ ജനരോഷം ഉയര്‍ന്ന സാഹചര്യത്തിലാണ് പ്രത്യേക അന്വേഷണ സംഘത്തെ നിയോഗിച്ചത്. കഴിഞ്ഞ മാസം തമിഴ്‌നാട് ബോഡിനായ്‌ക്കരന്‍ സ്വദേശി കനകരാജിനെ പോലീസ് പിടികൂടിയിരുന്നു.
കനകരാജിനെ ചോദ്യം ചെയ്തതിനെതുടര്‍ന്നാണ് സംഘത്തില്‍ രണ്ട്‌പേര്‍കൂടി ഉണ്ടെന്ന് പോലീസിന് മനസ്സിലായത്.പ്രതികളായ മറ്റ് രണ്ട് പേര് കേരളത്തിലേയ്‌ക്ക് പുറപ്പെട്ടിട്ടുണ്ടെന്ന് നേരത്തെ അന്വേഷണ സംഘത്തിന് വിവരം ലഭിച്ചിരുന്നു. തുടര്‍ന്ന് നടത്തിയ അന്വേഷണത്തിലാണ് മലപ്പുറത്ത് നിന്ന് പ്രതികളെ കസ്റ്റഡിയിലെടുത്തത്. പിടിയിലായവര്‍ മറ്റ് വിവിധ കേസുകളിലും പ്രതികളാണെന്നും പോലീസ് പറഞ്ഞു
പ്രതികരിക്കാൻ ഇവിടെ എഴുതുക: