ആലത്തൂര്‍: കാറിടിച്ച് അങ്കണവാടി ജീവനക്കാരിക്ക് പരിക്ക്. ഇരട്ടക്കുളം കുറുവട്ട അങ്കണവാടി ജീവനക്കാരി വെങ്ങന്നൂര്‍ പറക്കുന്നം ദാമോദരന്റെ ഭാര്യ സുമതിയ്‌ക്കാണ് (41) പരിക്കേറ്റത്.
ദേശീയപാത ഇരട്ടക്കുളം പെട്രോള്‍ പമ്പിനു സമീപം ഇന്നലെ രാവിലെ 9.30 ഓടയാണ് അപകടം. ഇരട്ടക്കുളം ബസ് സ്റ്റോപ്പില്‍ ബസിറങ്ങി അങ്കണവാടിയിലേക്ക് നടക്കുന്നതിനിടെ വടക്കഞ്ചേരി ഭാഗത്ത് നിന്ന് വന്ന കാര്‍ ഇവരെ ഇടിച്ചു തെറിപ്പിക്കുകയായിരുന്നു.
ഇടിയുടെ ആഘാതത്തില്‍ സമീപത്തെ പാടത്തേക്ക് തെറിച്ച് വീണ ഇവരെ നാട്ടുകാരാണ് ആശുപത്രിയിലെത്തിച്ചത്. ആലത്തൂരിലെ സ്വകാര്യ ആശുപത്രിയിലെത്തിച്ച ഇവരെ പിന്നീട് തൃശൂര്‍ സ്വകാര്യ ആശുപത്രിയില്‍ പ്രവേശിപ്പിച്ചു. ഇരട്ടക്കുളം പെട്രോള്‍ പമ്പില്‍ നിന്ന് എണ്ണയടിച്ച് ഇറങ്ങിയ ബൈക്ക് യാത്രക്കാരനെ രക്ഷിക്കാന്‍ ശ്രമിക്കുന്നതിനിടെയാണ് കാര്‍ അപകടത്തില്‍ പെട്ടത്.
ആലത്തൂര്‍ കോടതിയിലെ അഭിഭാഷകനായ ഷാനവാസാണ് കാര്‍ ഓടിച്ചിരുന്നത്. കാര്‍ അമിതവേഗതയിലായിരുന്നുവെന്നാണ് നാട്ടുകാര്‍ പറയുന്നത്.
പ്രതികരിക്കാൻ ഇവിടെ എഴുതുക: