ചെര്‍പ്പുളശ്ശേരി: അമിത വൈദ്യുതി പ്രസരണത്തെ തുടര്‍ന്ന് പന്നിയംകുറുശ്ശിയിലെ പതിനഞ്ചോളം വീടുകളിലെ വൈദ്യുതോപകരണങ്ങള്‍ നശിക്കുകയും ഒരു വീടിന്റെ അടുക്കള കത്തി നശിക്കുകയും ചെയ്തു.
പുലര്‍ച്ചെ നാട്ടുകാരുടെ ശ്രദ്ധയില്‍പ്പെട്ടതിനാല്‍ വന്‍ദുരന്തമാണ് ഒഴിവായത്. പന്നിയംകുറുശ്ശി പുളിയാട് കുന്ന് പ്രദേശത്തെ പതിനഞ്ചോളം വീടുകളിലെ ഫ്രിഡ്ജ്,ഫാന്‍, ഗ്രൈന്‍ഡര്‍,മിക്‌സി,വീടുകളിലെ വയറിങ്ങ് എന്നിവയാണ് അമിത വൈദ്യുതി പ്രസരണം കാരണം നശിച്ചത്.
രാത്രിയോടെ ഇടയ്‌ക്കിടക്ക് വൈദ്യുതി വന്നുംപോയുമിരുന്നു. ഇതിനിടെ അര്‍ദ്ധരാത്രിക്ക് ശേഷമാണ് അമിത വൈദ്യുതി പ്രവഹിച്ച് ഉപകരണങ്ങള്‍ കത്തി നശിച്ചത്.
പന്നിയംകുറുശ്ശി കള്ളിക്കുന്നത്ത് അബൂബക്കറിന്റെ വീട്ടിലാണ് വന്‍ നാശനഷ്ടമുണ്ടായത്.അബൂബക്കറിന്റെ വലിയ ഫ്രിഡ്ജ് പൂര്‍ണ്ണമായും കത്തി നശിച്ചു.ഫ്രിഡ്ജിന് തീപിടിച്ചതോടെ അടുക്കളയിലേക്കും തീ പടര്‍ന്നു. നാല് മണിയോടെ തീ ആളികത്തുന്നത് കണ്ട് അയല്‍വാസികളടക്കം എത്തി തീയണച്ചതിനാല്‍ വന്‍ ദുരന്തം ഒഴിവായി.
തൊട്ടടുത്തുള്ള ഗ്യാസ് സിലിണ്ടറിന് തീപിടിച്ചിരുന്നെങ്കില്‍ വന്‍ ദുരന്തത്തിനിടയായിരുന്‌നെന്ന് സമീപവാസികള്‍ പറയുന്നു.അബൂബക്കറിന്റെ വീട്ടിലെ മറ്റു വൈദ്യുതോപകരണങ്ങളും നശിച്ചു.
നഷ്ടമെത്രയെന്ന് കണക്കാക്കിയിട്ടില്ല. വൈദ്യുതി വകുപ്പ് അധികൃതര്‍ സ്ഥലത്തെത്തി പരിശോധന തുടങ്ങി.മുന്‍സിപ്പല്‍ കൗണ്‍സിലര്‍ കൃഷ്ണദാസും സ്ഥലത്തെത്തി വേണ്ട നടപടികള്‍ സ്വീകരിച്ചു. ഇത്തരത്തിലുള്ള വൈദ്യുതി പ്രവാഹത്തിന് കാരണമെന്തെന്ന് കണ്ടെത്തണമെന്നും അധികൃതരോട് ആവശ്യപ്പെട്ടു. ഈ പ്രദേശത്തെ വീടുകളിലെ വൈദ്യുതി ബന്ധം നിലച്ചമട്ടാണ്.
പ്രതികരിക്കാൻ ഇവിടെ എഴുതുക: