കാസര്‍കോട്: വ്യാപാരിയായ മണ്ടേക്കാപ്പിലെ രാമകൃഷ്ണ മൂല്യയുടെ കൊലപാതകത്തിന് പിന്നിലെ ഗൂഡാലോചന അന്വേഷിക്കണമെന്ന് ബിജെപി ജില്ലാ പ്രസിഡണ്ട് അഡ്വ.കെ.ശ്രീകാന്ത് ആവശ്യപ്പെട്ടു.
മോഷണക്കേസില്‍ സാക്ഷി പറഞ്ഞതിന്റെ വൈരാഗ്യമാണ് കൊലപാതകത്തിന് കാരണമെന്ന പോലീസ് ഭാഷ്യം വിശ്വസിക്കാന്‍ ബുദ്ധിമുട്ടാണ്. കേസിലെ പ്രതികളെ പിടിച്ചുവെന്നതിന് അപ്പുറത്തേക്ക് അന്വേഷിക്കാന്‍ പോലീസ് തയ്യാറാകുന്നില്ല.
കേസ് അന്വേഷണമവസാനിപ്പിക്കാന്‍ രാഷ്‌ട്രീയ സാമ്പത്തികമായ സമ്മര്‍ദ്ദങ്ങള്‍ പോലീസിനുമേലുണ്ട്. കേസ് നടത്താനെന്ന പേരില്‍ വ്യാപകമായി പണപ്പിരിവ് നടന്നുവരുന്നു. രാമകൃഷ്ണന്റെ കൊലപാതകം പ്രതികാര നടപടിയെന്ന നിലയില്‍ നടത്തിയ കൊലപാതകമാമെന്ന് പ്രചരിപ്പിച്ചുകൊണ്ടാണ് പണപ്പിരിവ് നടത്തുന്നതെന്നാണ് അറിയാന്‍ കഴിഞ്ഞത്.
പ്രതികള്‍ക്ക് കേസ് നടത്താനാവശ്യമായി ലഭിച്ചു കൊണ്ടിരിക്കുന്ന സാമ്പത്തിക സ്രോതസ്സുകളെ സംബന്ധിച്ച് ഉന്നത തല പോലീസ് അന്വേഷണം നടത്തണമെന്ന് ബിജെപി ആവശ്യപ്പെട്ടു. കൊലപാതക രീതിയും മുറിവുകളും സൂചിപ്പിക്കുന്നത് ഇത് ആസൂത്രിതമായ കൃത്യമാണെന്നാണ്.
വ്യാപകമായി പിരിച്ചു കൊണ്ടിരിക്കുന്ന പണമുപയോഗിച്ചു കൊണ്ട് നാട്ടില്‍ വര്‍ഗ്ഗീയ സംഘര്‍ഷങ്ങള്‍ ഉണ്ടാക്കാനുള്ള ശ്രമം നടക്കുന്നുവെന്ന് രഹസ്യാന്വേഷണ വിഭാഗങ്ങള്‍ റിപ്പോര്‍ട്ട് നല്‍കിയിട്ടും ബന്ധപ്പെട്ടവര്‍ ആവശ്യമായ നടപടികള്‍ സ്വീകരിക്കുന്നില്ല. കൊലയാളികള്‍ക്ക് സഹായം ചെയ്തവരെ രക്ഷിക്കാനുള്ള ശ്രമമാണ് പോലീസ് നടത്തുന്നതെങ്കില്‍ ജനാധിപത്യ രീതിയില്‍ ശക്തമായി പ്രതികരിക്കുമെന്ന് ശ്രീകാന്ത് കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: