മുണ്ടക്കയം: മൂവായിരത്തോളം പോസ്റ്റല്‍ ഉരുപ്പടികള്‍ പോസ്റ്റോഫീസ് വരാന്തയില്‍ ഉപേക്ഷിച്ച നിലയില്‍ കണ്ടെത്തി. സംഭവത്തില്‍ പോസ്റ്റ്മാനെ അറസ്റ്റ് ചെയ്തു. കൂട്ടിക്കല്‍, പോസ്റ്റോഫീസിന്റെ കീഴില്‍ പ്രവര്‍ത്തിക്കുന്ന കുറ്റിപ്ലാങ്ങാട്(മുക്കുളം)സബ്‌പോസ്റ്റോഫീസിന്റെ പിന്‍വശത്തെ വരാന്തയിലാണ് ചാക്കില്‍ നിറച്ച നിലയില്‍ സൂക്ഷിച്ച ഉരുപ്പടികള്‍ കണ്ടെത്തിയത്.
വ്യാഴാഴ്ച രാവിലെ ഏഴുമണിയോടെ നാട്ടുകാര്‍ കെട്ടിടത്തിന്റെ പിന്‍വശത്ത് മറ്റൊരാവശ്യത്തിനായി കയറിയപ്പോഴാണ് ചാക്കില്‍ പോസ്റ്റല്‍ ഉരുപ്പടികള്‍കണ്ടത്. ആധാര്‍ കാര്‍ഡ്, പോസ്റ്റല്‍ ബാലറ്റുപേപ്പറുകള്‍, വിവിധ ബാങ്കുകളില്‍ വിവിധ തസ്തികള്‍ക്കുളള നിയമന ഉത്തരവു അറിയിപ്പുകള്‍, കോടതി സമന്‍സ്,പൊലീസ്അടക്കം വിവിധ ഡിപ്പാര്‍ട്ടുമെന്റില്‍ നിന്നും അയച്ചിരിക്കുന്ന രേഖകള്‍, മുഖ്യമന്ത്രി പിണറായി വിജയന്‍, ഇ.എസ്.ബിജിമോള്‍ എംഎല്‍എ എന്നിവര്‍ അയച്ച കത്തുകള്‍, ബാങ്ക് ചെക്കുകള്‍ ഉള്‍പ്പെടെയുളള വിവിധ തപാല്‍ ഉരുപ്പടികളാണ് ഇവിടെ ആളുകള്‍ക്കു വിതരണം ചെയ്യാതെ സൂക്ഷിച്ചിരുന്നത്. കഴിഞ്ഞ ഒന്നരവര്‍ഷമായി വന്നിട്ടുളള ഉരുപ്പടികളാണ് ഇവ.
സംഭവവുമായി ബന്ധപ്പെട്ടു പോസ്റ്റോഫീസിലെ താത്കാലിക പോസ്റ്റുമാന്‍ മുണ്ടക്കയം, ചെളിക്കുഴി,കൊച്ചുപറമ്പില്‍, കെ,ആര്‍ അരുണ്‍കുമാറി(23)നെ പെരുവന്താനം പൊലീസ് അറസ്റ്റുചെയ്തു. രാവിലെ തപാല്‍ ഉരുപ്പടികള്‍ കണ്ട നാട്ടുകാര്‍ പഞ്ചായത്തംഗം ഐ.സി.വിപിന്‍, പഞ്ചായത്ത് പ്രസിഡന്റ് നെച്ചൂര്‍ തങ്കപ്പന്‍ എന്നിവരെ വിവരം അറിയിക്കുകയായിരുന്നു. ഇവര്‍ അറിയിച്ചതനുസരിച്ച് പെരുവന്താനം എസ്‌ഐ പി.ജെ.വര്‍ഗീസിന്റെ നേതൃത്വത്തില്‍ നടത്തിയ തിരച്ചിലില്‍ കുറ്റിപ്ലാങ്ങാട് സര്‍ക്കാര്‍ സ്‌കൂള്‍, പോസ്റ്റോഫീസിന്റെ സമീപത്തു താമസിക്കുന്നയാളുകളുടെയും കൊക്കയാര്‍ ഗ്രാമപഞ്ചായത്താഫിസിലേക്കുളള ഉരുപ്പടികളും വിതരണം ചെയ്തിട്ടില്ലെന്നു കണ്ടെത്തിയിട്ടുണ്ട്.
സംഭവം സംബന്ധിച്ചു താന്‍ നേരിട്ടെത്തി പ്രാഥമിക അന്വേഷണം നടത്തിയതായും താത്കാലിക പോസ്റ്റുമാന്‍ കുറ്റക്കാരനാണെന്നു മനസ്സിലാക്കിയതായും ചങ്ങനാശ്ശേരി പോസ്റ്റല്‍ സൂപ്രണ്ട് സാജന്‍ ഡേവിഡ് അറിയിച്ചു.
സംഭവം സംബന്ധിച്ചു വിശദമായ അന്വേഷണത്തിനു മുണ്ടക്കയം പോസ്റ്റല്‍ ഇന്‍സപെക്ടര്‍ ആര്യ.വി.മോഹനനെ ചുമതലപ്പെടുത്തി. ഒരാഴ്ചക്കുളളില്‍ വിശദമായ റിപ്പോര്‍ട്ടു ലഭിക്കുമെന്നും സൂപ്രണ്ട് അറിയിച്ചു. കഴിഞ്ഞ രണ്ടുവര്‍ഷമായി ദിവസവേതനത്തിനാണ് അരുണ്‍കുമാര്‍ ജോലി ചെയ്തുവരുന്നത്. ഇക്കാലയളവില്‍ പോസ്റ്റോഫീസില്‍ എത്തിയിട്ടുളള രജിസ്‌റ്റേഡ് ഉരുപ്പടികള്‍, മണി ഓര്‍ഡറുകള്‍ സ്പീഡ്‌പോസ്റ്റ് ഉരുപ്പടികള്‍ സംബന്ധിച്ചു ആളുകളെ നേരില്‍കണ്ടു അന്വേഷണം നടത്തുമെന്നും സൂപ്രണ്ട് അറിയിച്ചു. അറസ്റ്റിലായ അരുണ്‍കുമാറിനെ ഇന്ന് പീരുമേട് കോടതിയില്‍ ഹാജരാക്കും.
പ്രതികരിക്കാൻ ഇവിടെ എഴുതുക: