പത്തനംതിട്ട: ശബരിമല ധര്‍മ്മശാസ്താവിന് മണ്ഡലപൂജാവേളയില്‍ ചാര്‍ത്തുന്ന തങ്കഅങ്കി വഹിച്ചുകൊണ്ടുള്ള രഥത്തിന്റെ ശില്‍പിയും സാരഥിയുമായ തങ്കപ്പനാചാരി വിടവാങ്ങി. നാല് പതിറ്റാണ്ടായി ഒരു നിയോഗമായി തങ്കഅങ്കി രഥഘോഷയാത്ര നയിച്ചിരുന്ന അയ്യപ്പഭക്തന്റെ വിയോഗം നാടിന് തീരാനഷ്ടമായി. കോഴഞ്ചേരി കൊല്ലീരേത്ത് എം.കെ. തങ്കപ്പനാചാരി (71 ) ഇന്നലെയാണ് നിയോഗം പൂര്‍ത്തിയാക്കി കാലയവനികയ്‌ക്കുള്ളില്‍ മറഞ്ഞത്.
കോഴഞ്ചേരിയിലെ ഡ്രൈവറായിരുന്ന തങ്കപ്പനാചാരിയാണ് കഴിഞ്ഞ 40 വര്‍ഷമായി തന്റെ സ്വന്തം ജീപ്പ് രഥമാക്കി രൂപകല്‍പ്പന ചെയ്ത് ആചാരാനുഷ്ഠാനത്തോടെ തങ്കയങ്കി പമ്പയിലെത്തിച്ചിരുന്നത്. വര്‍ഷങ്ങള്‍ക്കുമുമ്പ് സ്വന്തമായിട്ടുണ്ടായിരുന്ന ജീപ്പ് കോട്ടയത്തെത്തിച്ച് അവിടെ നിന്നുമാണ് രഥമാക്കി മാറ്റിയിരുന്നത്. ഒരിക്കല്‍ രഥമാക്കി മാറ്റാന്‍ വേണ്ടി കൊടുത്ത ജീപ്പ് മോഷണം പോയി. ജീപ്പ് തിരികെ ലഭിച്ചാല്‍ തന്റെ വീട്ടില്‍ വെച്ച് തന്നെ രഥം നിര്‍മ്മിച്ച് അതില്‍ തങ്കയങ്കി പമ്പയിലെത്തിക്കാമെന്ന് അയ്യപ്പനോട് പ്രാര്‍ത്ഥിച്ചതുകൊണ്ടാണ് മോഷണം പോയ ജീപ്പ് തിരികെ ലഭിച്ചതെന്ന് ബന്ധുക്കള്‍ പറയുന്നു.
ഇതിന് ശേഷം മുടക്കം വരാതെ ഒരനുഷ്ഠാനമായിട്ടാണ് തങ്കപ്പനാചാരി തങ്കയങ്കി രഥത്തിലേറ്റി പമ്പയിലെത്തിച്ചിരുന്നത്. മണ്ഡല തീര്‍്ത്ഥാടനം ആരംഭിക്കുന്ന വൃശ്ചിക 1 മുതല്‍ തങ്കപ്പനാചാരിയും കുടുംബവും വ്രതാനുഷ്ഠാനം തുടങ്ങുന്നതാണ് മുടങ്ങാത്ത പതിവ്. മൂന്നു മക്കളുടേയും സഹായത്തോടെയാണ് തങ്കപ്പനാചാരി തങ്കഅങ്കി രഥം തയ്യാറാക്കിയിരുന്നത്. ഈവര്‍ഷം മണ്ഡലപൂജയ്‌ക്ക് തങ്കഅങ്കിയും വഹിച്ചുകൊണ്ട് രഥം നയിക്കാന്‍ ഇദ്ദേഹം ഇല്ലാത്തത് അയ്യപ്പഭക്തരിലും വേദന ഉളവാക്കുന്നു.
പ്രതികരിക്കാൻ ഇവിടെ എഴുതുക: