ബലൂണ്‍ കെട്ടിയും കേക്ക് ശാപ്പിട്ടും മുതലയുടെ പിറന്നാള്‍ ആഘോഷം!

ന്യൂയോർക്ക്: ഓർലാൻഡോയിൽ ഒരു മുതലയുടെ ജനമദിനാഘോഷം നടന്നു. ഒൻപത് അടി നീളവും ഒത്ത വണ്ണവുമുള്ള ‘ചോംബർ’ എന്ന് വിളിപ്പേരുള്ള മുതലയുടെ ജന്മദിനം ഏറെ വ്യത്യസ്തമായ രീതിയിലാണ് കാവൽക്കാരൻ കൊണ്ടാടിയത്.

സാധാരണ ജന്മദിനത്തിൽ സ്വാദൂറുന്ന മാംസ ഭക്ഷണങ്ങളാണ് ചോംബറിന് നൽകി വരാറ്. എന്നാൽ ഇത്തവണ കാവൽക്കാരൻ ചോംബറിന് നൽകിയ ജന്മദിന ആഘോഷം ഗംഭീരമായിരുന്നു. തലയിൽ ജന്മദിന തൊപ്പിയും കൈകളിൽ ബലൂണും പിടിച്ച് കൊണ്ടാണ് കാവൽക്കാരൻ ചോംബറിന് സമീപം എത്തിയത്.

ചോംബർ കിടക്കുന്ന കുളത്തിന്റെ ഭിത്തിയിൽ ജന്മദിന ആശംസകളും കാവൽക്കാരൻ ആലേഖനം ചെയ്തിരുന്നു. തുടർന്ന് ഫ്രിഡ്ജിൽ വച്ചിരുന്ന കൊതിയൂറുന്ന കേക്കുമായി കാവൽക്കാരൻ ചോംബറിന് സമീപം എത്തി. തന്റെ ജന്മദിന വിഭവം എത്തിയെന്ന് മനസിലാക്കിയ മുതല വായ തുറക്കുകയും ചെയ്തു. പിന്നെ താമസിച്ചില്ല കാവൽക്കാരൻ തന്റെ കൈയ്യിൽ ഉണ്ടായിരുന്ന വലിയ ക്രീം കേക്ക് ചോംബറിന്റെ വായിലേക്ക് എറിഞ്ഞിട്ടു കൊടുക്കുകയായിരുന്നു.

എന്തായാലും ക്രീം കേക്ക് ചോംബറിന് ഇഷ്ടമായി എന്നതിൽ സംശയമില്ല. ഒറ്റയടിക്ക് നമുടെ ‘ബെർത്ത്ഡേ ബോയ്’ കേക്ക് ശാപ്പിടുകയും ചെയ്തു.