ആലപ്പുഴ: മലയാളികളെ മാനംകെടുത്തിയ സര്‍ക്കാരാണ് കേരളം ഭരിക്കുന്നതെന്ന് ബിജെപി ദേശീയ നിര്‍വാഹക സമിതിയംഗം പി.കെ. കൃഷ്ണദാസ്. അഴിമതിക്കും ഒത്തുതീര്‍പ്പ് രാഷ്‌ട്രീയത്തിനുമെതിരെ വികസന സന്ദേശവുമായി ബിജെപി ജില്ലാ പ്രസിഡന്റ് വെള്ളിയാകുളം പരമേശ്വരന്‍ നയിക്കുന്ന രാഷ്‌ട്രീയ പ്രചരണജാഥ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സമസ്ത മേഖലയിലും ഉമ്മന്‍ചാണ്ടിയുടെ നേതൃത്വത്തിലുള്ള സര്‍ക്കാര്‍ പരാജയപ്പെട്ടു. മലയാളിയുടെ അഭിമാനവും അന്തസും ഈ സര്‍ക്കാര്‍ തകര്‍ത്തു. അഴിമതിയുടെ സുനാമിയാണ് യുഡിഎഫ് സര്‍ക്കാരിന്റെ കാലത്ത് നടക്കുന്നതെന്നും അദ്ദേഹം കുറ്റപ്പെടുത്തി. ഇക്കാര്യത്തില്‍ കോണ്‍ഗ്രസിലും ഗ്രൂപ്പും ഘടകകക്ഷികളെന്ന വ്യത്യാസവുമില്ല. ഗ്രൂപ്പിനതീതമായി കോണ്‍ഗ്രസുകാര്‍ ബഹുമാനിക്കുന്ന ഒരേയൊരു നേതാവ് സരിത എസ്.നായര്‍ മാത്രമാണ്.
കേരളത്തിലെ ജനങ്ങളെ വഞ്ചിച്ച സര്‍ക്കാരിനും പ്രതിപക്ഷത്തിനുമെതിരെ ബിജെപി പോരാട്ടം ശക്തമാക്കും. ജനങ്ങളുടെ മുന്നില്‍ മുന്നണികളുടെ ഒത്തുതീര്‍പ്പ് രാഷ്‌ട്രീയം തുറന്നു കാണിക്കുന്നതിനാണ് എല്ലാ ജില്ലാദ്ധ്യക്ഷന്മാരും ഇത്തരത്തില്‍ യാത്ര നടത്തുന്നതെന്നും അദ്ദേഹം പറഞ്ഞു.
ജില്ലാ വൈസ് പ്രസിഡന്റ് പി.കെ. വാസുദേവന്‍ അദ്ധ്യക്ഷത വഹിച്ചു. സംസ്ഥാന സെക്രട്ടറി. എ.ജി. ഉണ്ണികൃഷ്ണന്‍, ആര്‍എസ്പി-ബി സംസ്ഥാന സെക്രട്ടറി പ്രൊഫ. എ.വി. താമരാക്ഷന്‍, കര്‍ഷകമോര്‍ച്ച സംസ്ഥാന പ്രസിഡന്റ് കെ.എസ്. രാജന്‍, മഹിളാമോര്‍ച്ച സംസ്ഥാന പ്രസിഡന്റ് പി.എസ്. ഗീതാകുമാരി, ന്യൂനപക്ഷ മോര്‍ച്ച ദേശീയ സമിതിയംഗം അഡ്വ. ടി.ഒ. നൗഷാദ്, പട്ടികജാതിമോര്‍ച്ച സംസ്ഥാന ജനറല്‍ സെക്രട്ടറി സി.എ. പുരുഷോത്തമന്‍, കൊട്ടാരം ഉണ്ണികൃഷ്ണന്‍, എം.വി. ഗോപകുമാര്‍, കെ.ജി. കര്‍ത്ത, ജി. ജയദേവ്, സാനു സുധീന്ദ്രന്‍, പാലമുറ്റത്ത് വിജയകുമാര്‍, ആര്‍. ഉണ്ണികൃഷ്ണന്‍, രാജന്‍ കെ.മാത്യു, വിജയ രാംദാസ്, വിനോദ്കുമാര്‍ തുടങ്ങിയവര്‍ സംസാരിച്ചു. ജില്ലാസെക്രട്ടറി കെ. സോമന്‍ സ്വാഗതം പറഞ്ഞു.
പ്രതികരിക്കാൻ ഇവിടെ എഴുതുക: