ആലപ്പുഴ: മദ്യലഹരിയില്‍ കാര്‍ ഓടിച്ച് ഭീകരാന്തരീക്ഷം സൃഷ്ടിച്ചു. വണ്ടാനം മെഡിക്കല്‍ കോളേജ് ആശുപത്രി വളപ്പില്‍ കഴിഞ്ഞദിവസം വൈകിട്ടോടെയാണ് സംഭവം. ഹരിപ്പാട് ഭാഗത്തുനിന്നും രോഗിയുമായി ആശുപത്രിയിലെത്തിയ ഈയാള്‍ കാറില്‍ മടങ്ങുമ്പോള്‍ സമീപത്തു പാര്‍ക്ക് ചെയ്തിരുന്ന ഒരു ഡോക്ടറുടെ കാറില്‍ ഇടിക്കുകയായിരുന്നു. തുടര്‍ന്ന് റിവേഴ്‌സ് എടുത്ത കാര്‍ വീണ്ടും മറ്റൊരു കാറില്‍ ഇടിച്ചു. ഇടിച്ച കാറുമായി രക്ഷപെടാന്‍ ശ്രമിക്കുന്നതിനിടെ ഈ കാര്‍ രോഗിയുമായി ആശുപത്രി വളപ്പിലേക്ക് പ്രവേശിച്ച ഓട്ടോയില്‍ ഇടിച്ച് നില്‍ക്കുകയായിരുന്നു.
ഇടിയുടെ ആഘാതത്തില്‍ ഓട്ടോറിക്ഷ തകര്‍ന്നു. തുടര്‍ന്ന് സമീപത്തുണ്ടായിരുന്നവര്‍ എയ്ഡ്‌പോസ്റ്റ് പോലീസില്‍ വിവരം അറിയിക്കുകയും പോലീസ് എത്തി ഹരിപ്പാട് സ്വദേശിയായ കാര്‍ ഡ്രൈവറെ കസ്റ്റ്ഡിയില്‍ എടുക്കുകയായിരുന്നു. ഇതേസമയം മദ്യപിച്ച് അബോധാവസ്ഥയിലായ ഇയാള്‍ക്ക് കാലു പോലും താഴെ കുത്താന്‍ പറ്റാത്ത അവസ്ഥയിലായിരുന്നു. മദ്യപിച്ച് വാഹനമോടിച്ച് ഭീതിപരത്തിയ ഇയാള്‍ക്കെതിരെ പോലീസ് കേസ് എടുത്തു.
പ്രതികരിക്കാൻ ഇവിടെ എഴുതുക: