മാതൃഭൂമി ഓഫീസിന് മുന്നില്‍ കുത്തിയിരുന്ന ജി. സുധാകരന്‍ എംഎല്‍എയെ പന്ന്യന്‍ രവീന്ദ്രന്‍ സന്ദര്‍ശിക്കുന്നു
ആലപ്പുഴ: സിപിഎം വിഭാഗീയതയെ കുറിച്ച് വാര്‍ത്ത നല്‍കിയതിന്റെ പേരില്‍ മാതൃഭൂമി ആലപ്പുഴ ബ്യൂറോ ഓഫീസിനു മുന്നില്‍ ജി. സുധാകരന്റെ കുത്തിയിരിപ്പ് സമരം. ഞായറാഴ്ച ഉച്ചയ്‌ക്ക് പന്ത്രണ്ടോടെയാണ് സംഭവം. ആലപ്പുഴ ഏരിയ സമ്മേളനവുമായി ബന്ധപ്പെട്ട് വന്ന വാര്‍ത്തയാണ് സുധാകരനെ ചൊടിപ്പിച്ചത്. തനിക്കെതിരെ നിരന്തരം വ്യാജ വാര്‍ത്തകള്‍ പ്രചരിപ്പിക്കുകയാണെന്ന് സുധാകരന്‍ പറഞ്ഞു. മുന്‍പ് മൂന്ന് തവണ താന്‍ ബന്ധപ്പെട്ടവരെ അറിയിച്ചെങ്കിലും നടപടി സ്വീകരിച്ചില്ലെന്നും അതിനാലാണ് സമരവുമായി രംഗത്ത് എത്തേണ്ടി വന്നതെന്നും സുധാകരന്‍ പറഞ്ഞു. വാര്‍ത്തയുമായി ബന്ധപ്പെട്ട് അന്വേഷണം നടത്തുമെന്ന് മാതൃഭൂമി മാനേജ്‌മെന്റിന്റെ രേഖാമൂലമുള്ള ഉറപ്പും വാങ്ങിയാണ് ഒരു മണിക്കൂറോളം നീണ്ടുനിന്ന സമരം സുധാരന്‍ അവസാനിപ്പിച്ചത്. അതേസമയം സുധാകരനെതിരെ നഗരത്തില്‍ പോസ്റ്ററുകള്‍ പ്രത്യക്ഷപ്പെട്ടു. ആലപ്പുഴ ഏരിയ സമ്മേളനത്തിലെ വിഭാഗീയതയുടെ തുടര്‍ച്ചയായാണ് പോസ്റ്ററുകള്‍ പ്രത്യക്ഷപ്പെട്ടത്. ജി. സുധാകന്റെ മാടമ്പിത്തരം അവസാനിപ്പിക്കുക, സിപിഎമ്മിനെ രക്ഷിക്കുക എന്ന് രേഖപ്പെടുത്തിയ പോസ്റ്ററുകളാണ് വ്യാപകമായി പ്രചരിക്കുന്നത്.
പ്രതികരിക്കാൻ ഇവിടെ എഴുതുക: