കാസര്‍കോട്: മഞ്ചേശ്വരം ഗോവിന്ദപൈ ഗവ.കോളേജില്‍ എസ്എഫ്‌ഐ ഗുണ്ടാ വിളയാട്ടം. എബിവിപി പ്രവര്‍ത്തകരെ എസ്എഫ്‌ഐക്കാര്‍ ക്രൂരമായി മര്‍ദ്ദിച്ചു. ഭീകരാക്രമണത്തില്‍ കൊല്ലപ്പെട്ട ജവാന്മാര്‍ക്കുള്ള ആദരസൂചകമായി കഴിഞ്ഞ ദിവസം കോളേജില്‍ എബിവിപി പ്രവര്‍ത്തകര്‍ അവരുടെ ചിത്രങ്ങള്‍ പോസ്റ്ററൊട്ടിച്ചിരുന്നു.
എന്നാല്‍ ഇതില്‍ കലിപൂണ്ട എസ്എഫ്‌ഐ പ്രവര്‍ത്തകര്‍ ജവാന്മാരുടെ ചിത്രങ്ങള്‍ വലിച്ചുകീറി ഭീകരാന്തരീക്ഷം സൃഷ്ടിച്ചു. ജവാന്മാരുടെ പോസ്റ്ററുകള്‍ കീറിയതില്‍ പ്രതിഷേധിച്ച് എബിവിപി പ്രവര്‍ത്തകരുടെ നേതൃത്വത്തില്‍ പിന്നീട് കോളേജ് പ്രിന്‍സിപ്പാളിന് പരാതി നല്‍കിയിരുന്നു.
എന്നാല്‍ പരാതി അന്വേഷിച്ചതില്‍ പ്രതിഷേധിച്ച് എസ്എഫ്‌ഐ പ്രവര്‍ത്തകര്‍ കൂട്ടമായി വന്ന് എബിവിപി പ്രവര്‍ത്തകരെ നിഷ്‌കരുണം മര്‍ദ്ദിക്കുകയായിരുന്നു.
എസ്എഫ്‌ഐ യൂണിറ്റ് സെക്രട്ടറി അരൂണ്‍, യൂണിറ്റ് പ്രസിഡണ്ട് പ്രേംജിത്ത് ഗോവര്‍ദ്ധന്‍, ശരത്, രാജേഷ്, ഹിജേഷ്, രാകേഷ്, ഹരികൃഷ്ണന്‍, അശ്വിന്‍, അഭിലാഷ് തുടങ്ങിയ പത്തോളം വരുന്ന സംഘത്തിന്റെ നേതൃത്വത്തിലായിരുന്നു എബിവിപി പ്രവര്‍ത്തകരെ മര്‍ദ്ദിച്ചത്.
ഇവരുടെ അക്രമത്തില്‍ തലയ്‌ക്ക് ഗുരുതരമായി പരിക്കേറ്റ നെല്ലിക്കുന്ന് സ്വദേശി അവിനാശ് (20) ജില്ലാ ജനറല്‍ ആശുപത്രിയില്‍ ചികിത്സയിലാണ്. നിരവധി എബിവിപി പ്രവര്‍ത്തകര്‍ക്ക് അക്രമത്തില്‍ പരിക്കേല്‍ക്കുകയും ചെയ്തു.
പ്രതികരിക്കാൻ ഇവിടെ എഴുതുക: