ബൈക്കിലെത്തിയ യുവാവ് വീട്ടമ്മയെ അക്രമിച്ച് മാലകവര്‍ന്നു

കായംകുളം: ബൈക്കിന്റെ പിന്നിലിരുന്ന് യാത്രചെയ്ത വീട്ടമ്മയെ പിന്നാലെ ബൈക്കിലെത്തിയ യുവാവ് അടിച്ചു വീഴ്‌ത്തിയശേഷം അഞ്ച് പവന്റെ മാല കവര്‍ന്നു. പത്തിയൂര്‍ തിരുവോണം വീട്ടില്‍ രാജമ്മ (55)യുടെ മാലയാണ് അപഹരിച്ചത്. കഴിഞ്ഞ ദിവസം രാത്രി 8.30ന് ചെട്ടികുളങ്ങര കമുകുംവിള ജങ്ഷനു സമീപമായിരുന്ന സംഭവം. മാവേലിക്കരയിലുള്ള ബന്ധുവിന്റെ വിവാഹ നിശ്ചയ ചടങ്ങില്‍ പങ്കെടുത്ത ശേഷം വീട്ടിലേക്ക് ഭര്‍ത്താവ് രാമചന്ദ്രനൊപ്പം ബൈക്കില്‍ വരികയായിരുന്നു. ചെട്ടികുളങ്ങര ക്ഷേത്രം ജങ്ഷന്‍ കഴിഞ്ഞതോടെ ബൈക്കില്‍ പിന്തുടര്‍ന്നെത്തിയ യുവാവ് രാജമ്മയുടെ കഴുത്തില്‍ അടിച്ചശേഷം മാല പൊട്ടിച്ചെടുക്കുകയായിരുന്നു. പെട്ടെന്നുള്ള ആക്രമണത്തില്‍ ഭയന്ന് ബൈക്കില്‍നിന്നും രാജമ്മ റോഡില്‍ തലയടിച്ച് വീണു. ഉടന്‍ തന്നെ നാട്ടുകാര്‍ തട്ടാരമ്പലത്തിലുള്ള സ്വകാര്യ ആശുപത്രിയില്‍ എത്തിച്ചെങ്കിലും വീഴ്ചയില്‍ തലയ്‌ക്ക് ഗുരുതരമായി പരിക്കേറ്റ ഇവരെ പിന്നീട് കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. രാജമ്മയുടെ കൈപ്പത്തിയ്‌ക്കും തോളെല്ലിനും പൊട്ടലുണ്ട്. കായംകുളം പോലീസ് കേസെടുത്ത് അന്വേഷണം ആരംഭിച്ചു.