ബാങ്കോക്‌: തായ്‌ലന്റില്‍ പ്രധാനമന്ത്രി യിങ്ങ്ലക്‌ ഷിനാവത്രയുടെ രാജി ആവശ്യപ്പെട്ട്‌ പ്രക്ഷോഭം ശക്തമാകുന്നു. പ്രതിഷേധക്കാരെ പിരിച്ചുവിടാന്‍ നടത്തിയ പൊലീസ്‌ നടപടിയില്‍ നാലു പേര്‍ കൊല്ലപ്പെടുകയും നിരവധി പേര്‍ക്ക്‌ പരിക്കേല്‍ക്കുകയും ചെയ്തു. അതിനിടെ രണ്ടു ദിവസത്തിനകം പ്രധാനമന്ത്രി അധികാരമൊഴിയണമെന്ന്‌ പ്രക്ഷോഭകാരികള്‍ അന്ത്യശാസനം നല്കി. തലസ്ഥാന നഗരമായ ബാങ്കോക്കിലെ പ്രധാന സര്‍ക്കാര്‍ കേന്ദ്രങ്ങള്‍ ലക്ഷ്യമിട്ട്‌ പ്രതിഷേധക്കാരെ പിരിച്ചുവിടാനുള്ള ശ്രമങ്ങള്‍ക്കിടെയാണ്‌ നാലുപേര്‍ കൊല്ലപ്പെട്ടത്‌.
പ്രധാനമന്ത്രി ഷിനാവത്രയുടെ ഭരണം നിയന്ത്രിക്കുന്നത്‌ സ്ഥാനഭ്രഷ്ടനാക്കപ്പെട്ട മുന്‍ നേതാവ് തസ്കിന്‍ ഷിനാവത്രയാണെന്നാണ്‌ സമരക്കാര്‍ ആരോപിക്കുന്നത്‌. പ്രധാനമന്ത്രിയുമായി ചര്‍ച്ചയ്‌ക്കോ അനുരഞ്ജനത്തിനോ ഇല്ലെന്നും രണ്ടു ദിവസത്തിനകം അധികാരമൊഴിയണമെന്നും പ്രക്ഷോഭത്തിന്‌ നേതൃത്വം നല്‍കുന്ന സുതെപ്‌ തൗഗ്സുബാന്‍ വ്യക്തമാക്കി. അജ്ഞാത കേന്ദ്രത്തില്‍ കഴിയുന്ന പ്രധാനമന്ത്രിയുമായി കൂടിക്കാഴ്ച നടത്തിയ ശേഷമാണ്‌ സുതെപ്‌ ഇക്കാര്യം വ്യക്തമാക്കിയത്‌.
മാധ്യമപ്രവര്‍ത്തകരെ കാണാന്‍ പൊലീസ്‌ ആസ്ഥാന മന്ദിരത്തിലത്ത്യ പ്രധാനമന്ത്രി പ്രക്ഷോഭകര്‍ ഇരച്ചുകയറിയതിനെ തുടര്‍ന്ന്‌ അജ്ഞാത കേന്ദ്രത്തിലേക്ക്‌ രക്ഷപ്പെടുകയായിരുന്നു. രാജ്യത്ത്‌ ഒരാഴ്ചയായി തുടരുന്ന പ്രതിഷേധത്തിനിടെ ആദ്യമായാണ്‌ വെടിവെപ്പ്‌ നടക്കുന്നത്‌. സര്‍ക്കാര്‍ ഓഫീസുകള്‍, ടിവി കേന്ദ്രങ്ങള്‍, പൊലീസ്‌ ആസ്ഥാനങ്ങള്‍ തുടങ്ങി എട്ടോളം സ്ഥലങ്ങളില്‍ പ്രതിഷേധക്കാര്‍ തമ്പടിച്ചിരിക്കുകയാണ്‌. കഴിഞ്ഞ ദിവസം രാജ്യത്തെ ടെലികോം ആസ്ഥാനങ്ങള്‍ വളഞ്ഞ പ്രക്ഷോഭകാരികള്‍, രാജ്യത്തെ 10 സര്‍ക്കാര്‍ സ്ഥാപനങ്ങളും ആറു ടെലിവിഷന്‍ സ്റ്റേഷനുകളും പൊലീസ്‌ ആസ്ഥാനവും പിടിച്ചെടുക്കുമെന്ന്‌ മുന്നറിയിപ്പ്‌ നല്‍കിയിട്ടുണ്ട്‌. പട്ടാള അട്ടിമറിയിലൂടെ പുറത്തായ മുന്‍ പ്രധാനമന്ത്രി തക്സിന്‍ ഷിനാവത്രയെ മടക്കിക്കൊണ്ടുവരാന്‍ പൊതുമാപ്പ്‌ നിയമം നടപ്പാക്കാനുള്ള സര്‍ക്കാര്‍ ശ്രമമാണ്‌ പ്രതിഷേധത്തിനിടയാക്കിയിരിക്കുന്നത്‌. പ്രതിപക്ഷം കൊണ്ടുവന്ന അവിശ്വാസവോട്ടെടുപ്പില്‍ ഷിനാവത്ര വിജയിച്ചിരുന്നു.
പ്രതികരിക്കാൻ ഇവിടെ എഴുതുക: