കാമില പാര്‍ക്കര്‍
പ്രത്യേകിച്ച്‌ പ്രസ്താവനകളൊന്നും നടത്താതെ വിരുന്നുകാരിയായെത്തി ഈയാഴ്‌ച്ച മാധ്യമങ്ങളില്‍ നിറഞ്ഞുനിന്നത്‌ ബ്രിട്ടണിലെ ചാള്‍സ്‌ രാജകുമാരന്റെ ഭാര്യ കാമില രാജകുമാരിയായിരുന്നു. കേരളത്തിന്റെ ആതിഥേയത്വം ആവോളം ആസ്വദിക്കാനെത്തിയ കാമിലക്കുപിന്നാലെയായിരുന്നു മാധ്യമങ്ങള്‍. കഥകളിയും കളരിപ്പയറ്റും ആസ്വദിച്ച്‌ കുടുംബശ്രീ യൂണിറ്റുകളുടെ കരകൗശലവിദ്യകള്‍ കണ്ടമ്പരന്നു ബ്രിട്ടന്റെ രാജകുമാരി. കാമിലയെ അടുത്തുകണ്ട സന്തോഷത്തിലായിരുന്നു കുടുംബശ്രീ പ്രവര്‍ത്തകരും. അന്യനാട്ടില്‍ നിന്നെത്തിയ രാജകുമാരി തങ്ങള്‍ രാവും പകലുമെടുത്ത്‌ നിര്‍മ്മിച്ച വസ്തുക്കളെ അതിശയത്തോടെ കണ്ട്‌ അഭിനന്ദിച്ചപ്പോള്‍ സന്തോഷത്തിമര്‍പ്പിലായി ഇവര്‍. വിനോദസഞ്ചാരകേന്ദ്രങ്ങള്‍ മാത്രമല്ല എറണാകുളം ജില്ലാ ആശുപത്രിയിലും സന്ദര്‍ശനം നടത്തിയ കാമില നഴ്സങ്ങ്‌ വിദ്യാര്‍ത്ഥികളുമായി ആശയവിനിമയവും നടത്തി. ദേശീയ ഗ്രാമീണാരോഗ്യ ദൗത്യത്തിന്റെ ഭാഗമായി നടപ്പാക്കുന്ന ഭൂമിക സെന്ററുകളെക്കുറിച്ച്‌ നല്ല അഭിപ്രായം പറയാനും ഇവര്‍ മടിച്ചില്ല. ആദ്യഭാര്യ ഡയാന വിവാഹമോചിതയാകുകയും പിന്നീട്‌ വാഹനാപകടത്തില്‍ കൊല്ലപ്പെടുകയും ചെയ്തതിന്‌ ശേഷമാണ്‌ ചാള്‍സ്‌ രാജകുമാരന്‍ കാമിലയെ വിവാഹം കഴിച്ചത്‌. വര്‍ഷങ്ങള്‍ നീണ്ടുനിന്ന പ്രണയത്തിനൊടുവിലായിരുന്നു ഇവരുടെ വിവാഹം.
പ്രതികരിക്കാൻ ഇവിടെ എഴുതുക: