ലണ്ടന്‍: ഇംഗ്ലീഷ്‌ പ്രീമിയര്‍ ലീഗില്‍ ഇന്നു മാഞ്ചസ്റ്റര്‍ ഡെര്‍ബി. മാഞ്ചസ്റ്റര്‍ യുണൈറ്റഡും മാഞ്ചസ്റ്റര്‍ സിറ്റിയും സീസണില്‍ ആദ്യമായി മുഖാമുഖം വരുമ്പോള്‍ ആരാധകരുടെ ആകാംക്ഷയേറുകയാണ്‌. ഈ കളിയുടെ ഫലം കിരീടപ്പോരട്ടത്തില്‍ നിര്‍ണായകമാവും. രാത്രി 8.30 മുതല്‍ ഇഎസ്പിഎന്നില്‍ മത്സരം തത്സമയം കാണാം.
ലീഗില്‍ അത്ര മികച്ച തുടക്കമല്ല യുണൈറ്റഡും സിറ്റിയും കുറിച്ചിരിക്കുന്നത്‌. ചെല്‍സിയോട്‌ സമനില വഴങ്ങിയ യുണൈറ്റഡ്‌ ലിവര്‍പൂളിനോട്‌ ഞെട്ടിക്കുന്ന തോല്‍വിയേറ്റുവാങ്ങി. സിറ്റിയാകട്ടെ കാര്‍ഡിഫിനോട്‌ നാണംകെട്ടു. ദുര്‍ബലരായ സ്റ്റോക്ക്‌ സിറ്റിയും മാഞ്ചസ്റ്ററിലെ പുത്തന്‍ പണക്കാരെ പിടിച്ചുകെട്ടി. നാലു മത്സരങ്ങളില്‍ നിന്ന്‌ ഏഴു പോയിന്റാണ്‌ മാഞ്ചസ്റ്റര്‍ പ്രതിനിധികളുടെ സമ്പാദ്യം. സിറ്റി നാലാമതും യുണൈറ്റഡ്‌ അഞ്ചാം സ്ഥാനത്തും നിലകൊള്ളുന്നു.
അതേസമയം, മത്സരത്തിനു മുന്‍പ്‌ ടീമുകള്‍ക്ക്‌ ചില നല്ല വാര്‍ത്തകള്‍ ലഭിച്ചുകഴിഞ്ഞു. സിറ്റി നിരയില്‍ ക്യാപ്റ്റന്‍ വിന്‍സെന്റ്‌ കോംപായ്‌, സൂപ്പര്‍ മിഡ്ഫീല്‍ഡര്‍ ഡേവിഡ്‌ സില്‍വ എന്നിവര്‍ തിരിച്ചുവരും. യുണൈറ്റഡില്‍ ഡാനി വെല്‍ബെക്ക്‌ മടങ്ങിയെത്തും. സ്റ്റാര്‍ സ്ട്രൈക്കര്‍ വെയ്ന്‍ റൂണിയുടെ ഫോമും ഡേവിഡ്‌ മോയസിന്റെ ടീമിനു തുണയാകും. എന്നാല്‍ പരുക്കേറ്റ പ്രതിരോധ ഭടന്‍മാരായ ഫിലിപ്പ്‌ ജോണ്‍സും റാഫേലും ഇന്നു കളിക്കാനുള്ള സാധ്യത കുറവാണ്‌.
പ്രതികരിക്കാൻ ഇവിടെ എഴുതുക: