കറാച്ചി: പാക്കിസ്ഥാനില്‍ നാല്‌ പോലീസുകാര്‍ അജ്ഞാതന്റെ വെടിയേറ്റ്‌ മരിച്ചു.
പെട്രോളിങ്‌ വാഹനത്തിന്‌ നേരെ പതിയിരുന്ന്‌ ആക്രമണം നടത്തുകയായിരുന്നുവെന്ന്‌ പോലീസ്‌ വൃത്തങ്ങള്‍ പറയുന്നു. രാത്രി ഡ്യൂട്ടിയ്‌ക്ക്‌ പോയ പോലീസുകാരാണ്‌ കൊല്ലപ്പെട്ടതെന്ന്‌ മുതിര്‍ന്ന പോലീസ്‌ ഉദ്യോഗസ്ഥന്‍ താഹീര്‍ നവീദ്‌ പറഞ്ഞു.
പോലീസ്‌ വാഹനത്തിനുള്ളിലാണ്‌ നാല്‌ പേരുടേയും മൃതദേഹം കണ്ടെത്തിയത്‌. ഇവര്‍ക്ക്‌ നേരെ നിര്‍ത്താതെ വെടിവച്ചതിന്റെ ലക്ഷണമാണ്‌ കാണുന്നതെന്നും നവീദ്‌ പറഞ്ഞു. പോലീസ്‌ സേനയുടെ ആത്മവീര്യം കെടുത്തുകയെന്ന ഉദ്ദേശത്തോടെയാണ്‌ ആക്രമണം എന്നും അദ്ദേഹം പറഞ്ഞു.
പാക്കിസ്ഥാനിലെ സംഘര്‍ഷ മേഖലകളില്‍ ഒന്നായി അറിയപ്പെടുന്ന കറാച്ചി ഇസ്ലാമിക ഭീകരര്‍ ഒളിത്താവളമായിട്ടാണ്‌ ഉപയോഗിക്കുന്നത്‌.ഇവരുടെ പ്രവര്‍ത്തനത്തിനാവശ്യമായ ഫണ്ട്‌ കണ്ടെത്തുന്നത്‌ ബാങ്ക്‌ കൊള്ളയടിച്ചും കവര്‍ച്ചയിലൂടെയും തട്ടിക്കൊണ്ടുപോയി മോചനദ്രവ്യം ആവശ്യപ്പെട്ടും മറ്റുമാണ്‌.
പ്രതികരിക്കാൻ ഇവിടെ എഴുതുക: