നെടുമ്പാശ്ശേരി: ദേശീയപാത 47ല്‍ അത്താണിക്ക്‌ സമീപം ദേശത്ത്‌ മാരകായുധങ്ങളുമായി എത്തിയ 10 അംഗ സംഘത്തിന്റെ ആക്രമണത്തില്‍ അഞ്ചുപേര്‍ക്ക്‌ പരിക്കേറ്റു. പുറയാര്‍ കരേപ്പാടന്‍ ഷിഹാബ്‌, പുറയാര്‍ തെക്കയില്‍ ഫാസില്‍ (22) പുറയാര്‍ കല്ലുംകൊട്ടില്‍ ഷിഹാബ്‌ (25), പുറയാര്‍ പാറപ്പുറം മാലിക്‌ (25), പുറയാര്‍ കല്ലുവീട്ടില്‍പറമ്പില്‍ നാസര്‍ (22) എന്നിവര്‍ക്കാണ്‌ ഗുണ്ടാ ആക്രമണത്തില്‍ പരിക്കേറ്റത്‌. അക്രമണത്തില്‍ തലയ്‌ക്കും കൈകൈകാലുകള്‍ക്കും ഗുരുതരമായി പരിക്കേറ്റ ഇവരെ ആലുവയിലും പരിസരപ്രദേശങ്ങളിലുമുള്ള വിവിധ ആശുപത്രികളില്‍ പ്രവേശിപ്പിച്ചു. അത്താണി ഭാഗത്തുനിന്നും അഞ്ചു ബൈക്കുകളായി എത്തിയ സംഘം ദേശം കവലയില്‍ ചായ കുടിക്കാനെത്തിയ യുവാക്കളെ തിരഞ്ഞ്‌ പിടിച്ച്‌ ആക്രമിക്കുകയായിരുന്നു. മുന്‍ വൈരാഗ്യമാണ്‌ ജോലി കഴിഞ്ഞ്‌ ദേശം കവലയില്‍ ചായകുടിക്കാനെത്തിയ ചിലരെ തെരഞ്ഞുപിടിച്ച്‌ ആക്രമിക്കാന്‍ കാരണമെന്ന്‌ പറയപ്പെടുന്നു. നേരത്തെ ആസൂത്രണം ചെയ്ത്‌ എത്തിയ സംഘം ഭീകരാന്തരീക്ഷം സൃഷ്ടിച്ചാണ്‌ ആക്രമണം നടത്തിയത്‌. അക്രമം കണ്ട്‌ തടയാനെത്തിയ നാട്ടുകാരെ വടിവാള്‍ ഉള്‍പ്പെടെയുള്ള മാരകായുധങ്ങള്‍ ഉപയോഗിച്ച്‌ ഭീഷണിപ്പെടുത്തിയതായി പരാതി ഉയര്‍ന്നിട്ടുണ്ട്‌. വടിവാള്‍, ഇരുമ്പുദണ്ഡ്‌, എസ്‌ കത്തി, സൈക്കിള്‍ ചെയിന്‍ തുടങ്ങിയവ ഉപയോഗിച്ചാണ്‌ ദേശീയപാതയില്‍ അക്രമം അഴിച്ചുവിട്ടത്‌. വളരെ നാളുകളായി ചെങ്ങമനാട്‌ പഞ്ചായത്തില്‍ ഒതുങ്ങി കഴിഞ്ഞിരുന്ന അക്രമിസംഘം വീണ്ടും സജീവമായതുമൂലം നാട്ടുകാര്‍ വളരെ ഭീതിയിലാണ്‌.
Wednesday, November 27, 2024
ആക്രമണത്തില്‍ പരിക്ക്
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
പ്രതികരിക്കാൻ ഇവിടെ എഴുതുക: