കളമശ്ശേരി: പൊതുമരാമത്ത് വകുപ്പിന്റെ കീഴിലുള്ള സംസ്ഥാനത്തെ വിശ്രമ മന്ദിരങ്ങള് ബുക്ക് ചെയ്യുന്നത് സംബന്ധിച്ച സൈറ്റ് തകരാറില് ആയതോടെ ആവശ്യക്കാര് കൗണ്ടറില് എത്തി നേരിട്ട് ബുക്ക് ചെയ്യേണ്ട അവസ്ഥയാണ്. മെയ് 17ന് തകരാറിലായ സൈറ്റ് ഒരാഴ്ചയ്ക്കുള്ളില് പുനഃസ്ഥാപിക്കും എന്ന് പറഞ്ഞിരുന്നുവെങ്കിലും തകരാര് പരിഹരിക്കുന്നത് നീണ്ട് പോവുകയാണ്.
സംസ്ഥാനത്ത് ചെറുതും വലുതുമായ 156 വിശ്രമ മന്ദിരങ്ങളാണുള്ളത്. മുന്പ് ഉണ്ടായിരുന്ന ബുക്കിങ് സൈറ്റ് സുഗമമായി നടത്തിക്കൊണ്ടിരുന്നതാണ്. എന്നാല് പുതിയ രീതിയില് സൈറ്റ് വിഭാവനം ചെയ്യുകയാണെന്നും ഇതിനുവേണ്ടിയാണ് സൈറ്റ് നിര്ത്തിവച്ചതെന്നുമാണ് അധികൃതര് വ്യക്തമാക്കുന്നത്.
വെബ്സൈറ്റ് പ്രവര്ത്തനം നിലച്ചതോടെ സംസ്ഥാനത്തെ വിശ്രമ കേന്ദ്രങ്ങളിലെ താമസ സൗകര്യ ലഭ്യതയും മറ്റ് വിവരങ്ങളും അതത് ഓഫീസുകളിലെ ഉദ്യോഗസ്ഥര്ക്ക് പോലും ലഭ്യമാകുന്നില്ല. ഇതുമൂലം ഉപയോക്താക്കള്ക്ക് കൃത്യമായ വിവരങ്ങള് നല്കാനും ബുക്കിങ് നേരിട്ട് നടത്താനും പണം സ്വീകരിക്കാനും കഴിയാത്ത അവസ്ഥയാണ്. ഇപ്പോള് പണം നേരിട്ട് വാങ്ങിയാലും സൈറ്റില് ചേര്ക്കാന് പറ്റാത്ത അവസ്ഥയാണ്. പഴയ സൈറ്റില് ഉണ്ടായിരുന്ന വിവരങ്ങള് പുതിയ സൈറ്റില് അപ്ലോഡ് ചെയ്യാന് കഴിയാത്തതാണ് ഇപ്പോഴത്തെ പ്രതിസന്ധിക്ക് കാരണമായി പറയുന്നത്.
വിശ്രമ മന്ദിരത്തിന്റെ സൈറ്റ് സംവിധാനം കൈകാര്യം ചെയ്തിരുന്നത് സി-ഡിറ്റ് ആയിരുന്നു. എന്നാല് സി- ഡിറ്റിന്റെ പ്രവര്ത്തനം കാര്യക്ഷമമല്ല എന്നും ഉദ്യോഗസ്ഥരിലും പൊതുജനങ്ങളിലും അഭിപ്രായമുണ്ട്.
ഏതാനും ദിവസങ്ങള്ക്കുള്ളില് പ്രശ്നം പരിഹരിക്കപ്പെടും എന്നാണ് അധികൃതര് അവകാശപ്പെടുന്നത്. സൈറ്റ് ബുക്കിങ് സംവിധാനം ചില ഉദ്യോഗസ്ഥര് ദുരുപയോഗം ചെയ്യുന്നതായും ആരോപണമുണ്ട്. ചില ഉദ്യോഗസ്ഥര് ഔദ്യോഗിക ആവശ്യങ്ങള്ക്ക് എന്ന പേരില് വിശ്രമ മുറികള് ബുക്ക് ചെയ്ത് ദുരുപയോഗം ചെയ്യുന്നതായാണ് ആക്ഷേപം.
ജന്മഭൂമി ഓണ്ലൈന്