ന്യൂദല്ഹി: ഹോര്മൂസ് കടലിടുക്കു വഴി കടന്നുപോകുന്ന കപ്പലുകളില് ഭാരതത്തില് നിന്നുള്ള നാവികരെ നിയോഗിക്കരുതെന്ന് കേന്ദ്ര സര്ക്കാര് ഷിപ്പിങ്ങ് കമ്പനികളോട് നിര്ദേശിച്ചു. സമീപകാലത്ത് കപ്പലുകള്ക്കു നേരെയുണ്ടായ ആക്രമണങ്ങളില് രണ്ട് ഭാരത നാവികര് കൊല്ലപ്പെട്ട സാഹചര്യത്തിലാണ് കേന്ദ്രത്തിന്റെ കര്ശന നിര്ദേശം. ഇറാന്, ഇസ്രയേല്, യുഎസ് യുദ്ധം ഒരിടവേളയ്ക്ക് ശേഷം അതിശക്തമാകുകയും ഹോര്മൂസ് വഴി പോകുന്ന കപ്പലുകള് ആക്രമിക്കുകയും ചെയ്യുന്ന അന്തരീക്ഷമാണിപ്പോഴെന്നാണ് ഡയറക്ടറേറ്റ് ജനറല് ഓഫ് മാരിടൈം അഡ്മിനിസ്ട്രേഷന്റെ വിലയിരുത്തല്.
കപ്പല് കമ്പനികള്ക്ക് നല്കിയ പ്രധാന നിര്ദ്ദേശങ്ങള്
1. ഗള്ഫ് മേഖലയില് നിതാന്ത നിരീക്ഷണം വേണം, ജാഗ്രത പാലിക്കണം.
2. അടിയന്തര സാഹചര്യങ്ങളില് മാരിടൈം ഡൊമെയ്ന് അവയര്നസ് സെന്ററുമായി ബന്ധപ്പെടണം
3. അന്താരാഷ്ട്ര സുരക്ഷാ ചട്ടങ്ങള് കര്ശനമായി പാലിക്കണം.
4. ഗള്ഫ്, ഹോര്മുസ് കടലിടുക്ക്, മറ്റ് കനാലുകള് എന്നിവിടങ്ങളില് സുരക്ഷ ശക്തമാക്കണം.
5. ഷിപ്പിങ് കമ്പനികള് നാവിക മുന്നറിയിപ്പുകളും സുരക്ഷാ നിര്ദ്ദേശങ്ങളും സൂക്ഷ്മമായി നിരീക്ഷിക്കണം.
6. അന്താരാഷ്ട്ര കപ്പല്-തുറമുഖ സുരക്ഷാ കോഡ് കര്ശനമായി പാലിക്കണം.
7. മോശം സാഹചര്യത്തില് ഇന്ഫര്മേഷന് ഫ്യൂഷന് സെന്റര് ഇന്ത്യന് ഓഷ്യന് റീജിയന്, ഡിജി കമ്മ്യൂണിക്കേഷന് സെന്റര് എന്നിവയുമായി ബന്ധപ്പെടണം.
