കണ്ണൂര്: അഞ്ചരക്കണ്ടി ദന്തല് മെഡിക്കല് കോളേജിലെ ഒന്നാം വര്ഷ ബി.ഡി.എസ് വിദ്യാര്ഥി നിതിന് രാജിന്റെ മരണത്തില് മനുഷ്യാവകാശ കമ്മീഷന് കേസെടുത്തു.വിദ്യാര്ഥിയുടെ മരണത്തെ കുറിച്ച് കുടുംബത്തിന്റെ ആരോപണങ്ങള് ഒരാഴ്ചക്കകം അന്വേഷിച്ച് റിപ്പോര്ട്ട് സമര്പ്പിക്കണമെന്ന് മനുഷ്യാവകാശ കമ്മീഷന് ജുഡീഷ്യല് അംഗം കെ.ബൈജുനാഥ് കണ്ണൂര് സിറ്റി പൊലീസ് മേധാവിയ്ക്ക് നിര്ദേശം നല്കി.
മാധ്യമ വാര്ത്തകളുടെ അടിസ്ഥാനത്തിലാണ് കമ്മീഷന് സ്വമേധയാ കേസെടുത്തത്.തിരുവനന്തപുരം ആനമങ്ങാട് സ്വദേശി ആര്.എല്. നിതിന് രാജിന്റെ മരണത്തിന് കാരണം കോളേജ് അധ്യാപകര് ജാതി പറഞ്ഞും നിറത്തിന്റെ പേരിലും പണമില്ലാത്തതിന്റെ പേരിലും അപമാനിച്ചതിനാലാണെന്നാണ് ആരോപണം.
മകന് അധ്യാപകരില് നിന്ന് ശക്തമായ ജാതിയധിപേക്ഷം നേരിട്ടിരുന്നുവെന്നും മകനെ തള്ളിയിട്ടു കൊന്നതെന്ന് സംശയമുണ്ടെന്നും കുടുംബം പറഞ്ഞു. അധ്യാപകരില് നിന്നുണ്ടായ ദുരനുഭവങ്ങള് വ്യക്തമാക്കുന്ന ശബ്ദരേഖയും പുറത്തുവന്നു. കയ്യും കാലും വെട്ടുമെന്ന് ഭീഷണിപ്പെടുത്തി, അമ്മയെ കുറിച്ച് പരിഹസിച്ചു , പുഴുത്ത പട്ടിയെന്നായിരുന്നു വിളിപ്പേര്.അനുഭവിച്ച ദുരിതങ്ങള് നിതിന് സഹോദരങ്ങളോടും പങ്കുവെച്ചിരുന്നു. മകന് ആത്മഹത്യ ചെയ്യാന് സാധ്യതയില്ലെന്നും കുടുംബം പറയുന്നു.
കോളേജില് റാഗിംഗ് നടക്കുന്ന വിവരവും നിതിന് രാജ് നേരത്തേ കുടുംബത്തോട് പങ്കുവെച്ചിട്ടുണ്ട്. സഹപാഠികള്ക്ക് മുന്നില് അപമാനിക്കപ്പെടുന്നത് വിദ്യാര്ഥിയെ സമ്മര്ദ്ദത്തിലാക്കിയിരുന്നു.
