കൊച്ചി: ട്വന്റി 20യില്നിന്നു രാജിവച്ച പൂതൃക്ക പഞ്ചായത്ത് പ്രസിഡന്റ് പൂജ ജോമോന് കുന്നത്തുനാട് കോണ്ഗ്രസ് സ്ഥാനാര്ഥിയും മുന് എംഎല്എ വി.പി. സജീന്ദ്രനുമായി 20 ലക്ഷം രൂപയുടെ ഡീല് ആണ് നടത്തിയതെന്ന് സാബു എം. ജേക്കബ്. ഡീല് ഉറപ്പിക്കുന്ന ദൃശ്യങ്ങള് ട്വന്റി 20 ചീഫ് കോര്ഡിനേറ്റര് സാബു ജേക്കബ് വാര്ത്താസമ്മേളനത്തില് പുറത്തുവിട്ടു
പൂതൃക്ക സഹകരണ ബാങ്ക് പ്രസിഡന്റ് അനിബെന് കുന്നത്ത്, പൂതൃക്ക കോണ്ഗ്രസ് മണ്ഡലം പ്രസിഡന്റ് പീറ്റര് കുപ്ലാശേരി എന്നിവരുമായാണ് പൂജ ജോമോന് ഡീല് ഉറപ്പിച്ചത്.ഇതിന്റെ ദൃശ്യങ്ങളാണ് പുറത്തുവിട്ടത്. ഡീല് തെളിയിച്ചാല് രാഷ്ട്രീയ ജീവിതം അവസാനിപ്പിക്കാമെന്ന് സജീന്ദ്രന് പറഞ്ഞതിന് പിന്നാലെയാണ് സാബു ജേക്കബ് ദൃശ്യങ്ങള് പുറത്തുവിട്ടത്.
പൂതൃക്ക സഹകരണ ബാങ്കിലേക്ക് വിളിച്ചു വരുത്തിയാണ് പൂജ ജോമോനുമായി ഡീല് ഉണ്ടാക്കിയത്. അഞ്ച് ലക്ഷം രൂപ പണമായും ഏഴ് ലക്ഷത്തിന്റെ ബാങ്ക് വായ്പയും അതിന്റെ പലിശയും ചേര്ന്ന് 15 ലക്ഷത്തിനായിരുന്നു ആദ്യ ഡീല് ഉറപ്പിച്ചത്. എന്നാല് ഈ വിവരം പുറത്തായതോടെ പൂജ അഞ്ച് ലക്ഷം രൂപ കൂടി അധികം ആവശ്യപ്പെട്ടു. 20 ലക്ഷമാക്കി നല്കാന് കോണ്ഗ്രസ് നേതൃത്വം സമ്മതിക്കുകയായിരുന്നു.
ഡീല് ഉറപ്പിച്ച ശേഷം ബെന്നി ബെഹ്നാന് അവിടെ എത്തി സംസാരിച്ച് ഉറപ്പിച്ചു. ബാങ്കില് നടന്ന ഡീല് ചര്ച്ചയ്ക്ക് ശേഷം മാര്ച്ച് 27ന് വൈകിട്ട് 6.45 ഓടെ സജീന്ദ്രന്റെ വെളള ഇന്നോവ കാറിലും തുടര്ന്ന് കോലഞ്ചേരിയിലെ സെന്ട്രല് ഇലക്ഷന് കമ്മിറ്റി ഓഫീസിലും വച്ചാണ് അന്തിമ ഡീല് ഉറപ്പിച്ചത്. ഇതുപോലെ കോളനികളില് കയറി കോണ്ഗ്രസ് പ്രവര്ത്തകര് 5000, 10000 രൂപ വച്ച് കൊടുത്തുകൊണ്ടിരിക്കുകയാണെന്നും സാബു ജേക്കബ് പറഞ്ഞു.
നിയമവിരുദ്ധ പ്രവര്ത്തനത്തിലൂടെ കുന്നത്തുനാട് പിടിച്ചെടുക്കാമെന്നാണ് കോണ്ഗ്രസ് ധരിച്ചിരിക്കുന്നത്. ജനാധിപത്യത്തെ വിലക്കെടുക്കുന്ന പ്രവര്ത്തനമാണ് കോണ്ഗ്രസ് കേരളത്തില് നടത്തുന്നത്. ട്വന്റി 20 ഭരണം അട്ടിമറിക്കുകയാണ് ലക്ഷ്യം. ഇരുപത് ലക്ഷം ലക്ഷം അവരെ സംബന്ധിച്ച് ഒരു നഷ്ടമല്ല. തെളിവ് നല്കിയാല് രാഷ്ട്രീയ ജീവിതം അവസാനിപ്പിക്കാമെന്ന് സജീന്ദ്രന് പറഞ്ഞിരുന്നു. ആ വാക്ക് പാലിക്കണം. ഈ തെരഞ്ഞെടുപ്പില് മത്സരിക്കുന്നില്ലെന്ന് പറഞ്ഞ് പിന്വാങ്ങണമെന്ന് സാബു ജേക്കബ് ആവശ്യപ്പെട്ടു.
ട്വന്റി 20 എന്ഡിഎയിലെത്തിയത് അംഗീകരിക്കാനാകില്ലെന്ന വാദമുയര്ത്തിയായിരുന്നു പൂജ ജോമോന് രാജിവച്ചത്.
