വളർത്തുപക്ഷികളായും പന്തയപ്പക്ഷികളായും പ്രാവുകളെ വളർത്താറുണ്ട്. ലോകത്തിലെ ഏറ്റവും വിലകൂടിയ പക്ഷി ഏതെന്നു ചോദിച്ചാൽ അതൊരു പ്രാവാണെന്നാണ് ഉത്തരം. ന്യൂകിം എന്നു പേരുള്ള ബെൽജിയത്തിൽ നിന്നുള്ള പെൺപ്രാവാണ് ഇത്. ഏകദേശം 19 ലക്ഷം യുഎസ് ഡോളറിനാണ്(172 കോടി രൂപ) 2020ൽ ഈ പ്രാവിനെ വിറ്റത്. ഇതിനെ സ്വന്തമാക്കാനായി വിവിധ വ്യക്തികൾ രംഗത്തുവന്നതോടെ ലേലം രണ്ടാഴ്ച വരെ നീണ്ടിരുന്നു. ഒടുവിൽ ചൈനയിൽ നിന്നുള്ള അജ്ഞാതനായ ഒരു വ്യക്തി ഈ പ്രാവിനെ സ്വന്തമാക്കി.
പ്രാവുപറത്തൽ മത്സരത്തിന് നല്ല വേരോട്ടമുള്ള രാജ്യമാണ് യൂറോപ്പിൽ സ്ഥിതി ചെയ്യുന്ന ബെൽജിയം. 2018ൽ ഒരു വർഷം മാത്രമാണു ന്യൂകിം പ്രാവുപറത്തൽ മത്സരത്തിൽ പങ്കെടുത്തത്. അന്ന് അനേകം വിജയങ്ങൾ ഈ പ്രാവ് കൊയ്തു. പല കാലാവസ്ഥകളെയും ദൂരമേഖലകളെയുമൊക്കെ കീഴ്പ്പെടുത്തിയായിരുന്നു ന്യൂ കിമ്മിന്റെ വിജയങ്ങൾ.
ചൈനയിലും പ്രാവുപറത്തൽ മത്സരങ്ങൾക്ക് അടുത്തകാലത്തായി വലിയ ജനപ്രീതിയുണ്ട്. അതിനാലാണ് ന്യൂ കിമ്മിനെ ചൈനീസ് പൗരൻ വാങ്ങിയതെന്നാണു കരുതപ്പെടുന്നത്. ന്യൂ കിമ്മിനു മുൻപ് അർമാൻഡോയെന്ന ആൺപ്രാവായിരുന്നു ലോകത്തെ ഏറ്റവും വിലകൂടിയ പക്ഷി. ന്യൂ കിമ്മിന്റെ പേര് പ്രശസ്തമായതിനെത്തുടർന്ന് പിൽക്കാലത്ത് പല പന്തയപ്രാവുകൾക്കും ഈ പേര് നൽകിയിട്ടുണ്ട്. ന്യൂ കിം 2, ന്യൂ കിം 3 തുടങ്ങിയ പേരുകൾ.
