ചെട്ടികുളങ്ങര: മതം ഈശ്വര സങ്കല്പ്പത്തിന്റെ അടിസ്ഥാനത്തിലുള്ളതാണെന്ന് ഹിന്ദുഐക്യവേദി സംസ്ഥാന വര്ക്കിങ് പ്രസിഡന്റ് വത്സന് തില്ലങ്കേരി. ചെട്ടികുളങ്ങരയില് സംഘടിപ്പിച്ച ഹിന്ദു ഏകത സമ്മേളനത്തില് മുഖ്യപ്രഭാഷണം നടത്തുകയായിരുന്നു അദ്ദേഹം.
ചിന്താ സ്വാതന്ത്ര്യത്തെ അംഗീകരിച്ച ധര്മ്മമാണ് സനാതന ധര്മ്മം. എല്ലാവരെയും അംഗീകരിക്കുന്നവരാണ് ഹിന്ദുസമൂഹം. ഹിന്ദു എന്നത് ഈ നാട് ഉദയം ചെയ്തപ്പോള് മുതലുള്ള നാമമാണ്. ഹിന്ദുത്വം ഇല്ലാതായാല് പിന്നെ ഭാരതമില്ല. മാതൃഭൂമിയെ പുണ്യഭൂമിയായും കര്മ്മഭൂമിയായും ആരാണോ കരുതുന്നത് അവനാണ് ഹിന്ദു.
ഈ പ്രപഞ്ചത്തില് എല്ലായിടത്തും സ്പുരിക്കുന്നത് പരമാത്മ ചൈതന്യമാണ്. അമരമായി നിലനില്ക്കുന്നതാണ് സനാതന ധര്മ്മം. ധര്മ്മത്തെ രക്ഷിച്ചാല് ധര്മ്മം നമ്മെ രക്ഷിക്കും. ധര്മ്മത്തെ ആചരിക്കുന്ന ഒരു പരമ്പര ഭാരതത്തിലുണ്ടെന്നും അതിനാല് നാനാ വിഭാഗങ്ങള് ചേര്ന്ന ഭാരതം സനാതനമായി നിലനില്ക്കുമെന്നും അദ്ദേഹം പറഞ്ഞു.
കരിമുളയ്ക്കല് ധര്മ്മാശ്രമം ധര്മ്മാചാര്യന് സ്വാമി ശിവാനന്ദ സരസ്വതി ഉദ്ഘാടനം ചെയ്തു. ഹൈന്ദവസമൂഹത്തിന്റെ ബലഹീനത ചിലര് ചൂഷണം ചെയ്യുന്നു. സാമൂഹിക യാഥാര്ത്ഥ്യം തിരിച്ചറിഞ്ഞ് നാം ഒന്നാണെന്ന ചിന്ത ഉണ്ടാകേണ്ടിയിരിക്കുന്നുവെന്നും കാലത്തിന്റെ അനിവാര്യതയ്ക്ക് ഹിന്ദു എല്ലായിടത്തും ഉണരേണ്ടതുണ്ടെന്നും സ്വാമി പറഞ്ഞു. എസ്എന് ട്രസ്റ്റ് എക്സിക്യൂട്ടീവ് മെമ്പര് പ്രീതി നടേശന് വിശിഷ്ട അതിഥിയായി. സംഘാടക സമിതി ചെയര്മാന് കരിമ്പിന് പുഴ മുരളി അധ്യക്ഷത വഹിച്ചു.
ജനറല് കണ്വീനര് എം.പ്രഗത്ഭന്, ട്രഷറര് പി. രാജേഷ് എന്നിവര് സംസാരിച്ചു. വിവിധ സാമുദായിക സംഘടനാ പ്രതിനിധികള് പങ്കെടുത്തു. പരിപാടിയോടനുബന്ധിച്ച് സോപാനസംഗീതം, തിരുവാതിര, കളരിപ്പയറ്റ്, മുടിയേറ്റ് എന്നിവയും നടന്നു.
