മലപ്പുറം:പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ചെന്ന കേസില് നിലമ്പൂര് പൊലീസ് അറസ്റ്റുചെയ്ത മുന് പൊലീസ് ഉദ്യോഗസ്ഥനും മോട്ടിവേഷന് സ്പീക്കറുമായ ഫിലിപ്പ് മമ്പാടിന്റെ ജാമ്യാപേക്ഷ കോടതി തള്ളി.
മഞ്ചേരി അഡീഷണല് ജില്ലാ സെഷന്സ് കോടതി ആണ് ജാമ്യാപേക്ഷ തള്ളിയത്. ചേവായൂര് പൊലീസിനു ലഭിച്ച പരാതിയില് കഴിഞ്ഞമാസം 13നാണ് ഫിലിപ് മമ്പാടിനെ അറസ്റ്റു ചെയ്തത്.
കൗണ്സിലിംഗിന് എത്തിച്ച മാനസിക വെല്ലുവിളി നേരിടുന്ന പെണ്കുട്ടിയെ കുട്ടിയെ രക്ഷിതാക്കള് ഫിലിപ്പിന്റെ വീട്ടില് താമസിക്കാന് അനുവദിക്കുകയായിരുന്നു. തുടര്ന്ന് കൗണ്സിലിംഗിന്റെ ഭാഗമായെന്ന പേരില് കുട്ടിയെ കാഞ്ഞങ്ങാട് ലോഡ്ജില് കൊണ്ടുപോയി ലൈംഗികമായി പീഡിപ്പിച്ചുവെന്നാണ് കേസ്.
ലോഡ്ജ് ലഡ്ജറിലെ ഫിലിപ്പിന്റെ കൈയക്ഷരവും ഒപ്പും പരിശോധിക്കുന്നതിനായി കഴിഞ്ഞ ദിവസം കോടതി അനുമതി നല്കി.ഇതിന്റെ പരിശോധന ഫലം വൈകുമെന്നത് കൊണ്ടും 80 വയസുളള മാതാവിനെ സംരക്ഷിക്കേണ്ട കടമയുള്ളതിനാലും ജാമ്യം അനുവദിക്കണമെന്നായിരുന്നു പ്രതിഭാഗത്തിന്റെ വാദം.
എന്നാല് പരിശോധന ഫലം ഉടന് ലഭ്യമാക്കാമെന്നും പ്രായമായ മാതാവിനെ സംരക്ഷിക്കാന് മകളുണ്ടെന്നും പ്രതിക്ക് ജാമ്യം അനുവദിച്ചാല് തെളിവു നശിപ്പിക്കാനും പരാതിക്കാരെ സ്വാധീനിക്കാനും സാധ്യതയുണ്ടെന്നുമുള്ള സ്പെഷല് പബ്ലിക് പ്രോസിക്യൂട്ടറുടെ വാദം കോടതി അംഗീകരിച്ചു.
