കോഴിക്കോട് : മുന് മന്ത്രിയും മുസ്ലീം ലീഗ് നേതാവുമായ ഡോ എം കെ മുനീറിന്റെ കടബാധ്യത തീര്ത്ത് പാര്ട്ടി. 49 ലക്ഷം രൂപ ബാങ്കില് അടച്ചതോടെ ജപ്തി ഭീഷണി ഒഴിവായി.
കഴിഞ്ഞദിവസം പാണക്കാട് സാദിക്കലി ശിഹാബ് തങ്ങളും പി കെ കുഞ്ഞാലിക്കുട്ടിയും എം കെ മുനീറിനോട് ഫോണില് സംസാരിച്ചിരുന്നു. പ്രശ്നത്തില് ഇടപെട്ടിട്ടുണ്ടെന്നും ജപ്തി ഒഴിവാക്കാനുള്ള നടപടികള് സ്വീകരിച്ചിട്ടുണ്ടെന്നും ലീഗ് നേതാക്കള് അറിയിച്ചു..
പാര്ട്ടി നേതാക്കള് വിളിച്ച് കാര്യങ്ങളൊക്കെ അന്വേഷിച്ചു. ഇതുവരെ അവരോട് താന് ഒന്നും പറഞ്ഞിട്ടില്ലായിരുന്നു.പാര്ട്ടിയെ ബുദ്ധിമുട്ടിക്കണ്ട എന്ന് വിചാരിച്ച് പറയാതിരുന്നതാണ്. 31വരെ ബാങ്ക് അവധി തന്നിരുന്നു. അതിനകം അടച്ചില്ലെങ്കില് നടപടിയെടുക്കും- എം കെ മുനീര് പറഞ്ഞു.
തനിക്കെപ്പോഴും തുണയായി നിന്നിട്ടുള്ളത് പാര്ട്ടിയാണ്. എംഎല്എ എന്ന നിലയ്ക്കും മന്ത്രി എന്ന നിലയ്ക്കുമുള്ള ശമ്പളം കിട്ടിയത് പാര്ട്ടിയെ കൊണ്ടല്ലേ. തന്റെ പിതാവിന് ശേഷം തന്നെ സംരക്ഷിച്ചുവന്നിട്ടുള്ളത് പാര്ട്ടിയാണെന്നും മുനീര് പറഞ്ഞു.
വീട് നവീകരിക്കാന് ടൗണ് സര്വീസ് സഹകരണ ബാങ്കില് നിന്ന് മുനീര് 35 ലക്ഷം രൂപയുടെ വായ്പ എടുത്തിരുന്നു. തിരിച്ചടവ് മുടങ്ങിയതോടെ അത് പലിശയടക്കം 58 ലക്ഷം രൂപയായി. ഒരുതവണ ബാങ്ക് വായ്പ പുതുക്കി നല്കി. അതിനുശേഷം ഒരിക്കല്പ്പോലും തിരിച്ചടവുണ്ടായില്ല. നിരവധി തവണ ബാങ്ക് അധികൃതര് നോട്ടീസയച്ചു.ഇപ്പോള് വായ്പ അടയ്ക്കാന് മുനീറിന്റെ കുടുംബം സന്നദ്ധത അറിയിച്ചിട്ടുണ്ട്. പരമാവധി ഇളവ് വേണമെന്നും ബാങ്ക് അധികൃതരോട് അഭ്യര്ത്ഥിച്ചു. തുടര്ന്ന് വായ്പ കുടശിക 49 ലക്ഷമായി കുറച്ചു.
