തിരുവനന്തപുരം : വർക്കലയിൽ ഹോംസ്റ്റേയിൽ താമസിക്കുകയായിരുന്ന ലിത്വാനിയൻ യുവതിയെ ഉപദ്രവിക്കാൻ ശ്രമിച്ച സംഭവത്തിൽ കോയമ്പത്തൂർ സ്വദേശി ആൻഡ്രുവിനെ (27) പോലീസ് അറസ്റ്റ് ചെയ്തു. ഇലക്ട്രിക്കൽ എൻജിനീയറായ ഇയാൾ യുവതി താമസിച്ചിരുന്ന പാപനാശം നോർത്ത് ക്ലിഫിലെ അതേ ഹോംസ്റ്റേയിലെ മറ്റൊരു മുറിയിലാണ് കഴിഞ്ഞിരുന്നത്.
ഇന്നലെ പുലർച്ചെ യുവതിയുടെ മുറിയിൽ അതിക്രമിച്ചു കയറി ഇവരെ ഉപദ്രവിക്കാൻ ശ്രമിക്കുകയായിരുന്നു എന്നാണ് പരാതി. യുവതിക്കൊപ്പം ഉണ്ടായിരുന്നവർ പുറത്തുപോയ സമയം നോക്കിയാണ് പ്രതി മുറിക്കുള്ളിൽ കടന്നത്.
യുവതിയുടെ മുറിയുടെ വാതിൽ ലോക്ക് ചെയ്തിരുന്നില്ലെന്നത് മുതലെടുത്താണ് പ്രതി ഉള്ളിൽ കടന്നതെന്ന് പോലീസ് അറിയിച്ചു. ലിത്വാനിയൻ സ്വദേശിനിയുടെ പരാതിയിൽ ഉടനടി നടപടിയെടുത്ത വർക്കല പോലീസ് പ്രതിയെ കസ്റ്റഡിയിലെടുത്തു. നിയമനടപടികൾ പൂർത്തിയാക്കി ഇയാളെ ഇന്ന് കോടതിയിൽ ഹാജരാക്കും.
കഴിഞ്ഞ മാസവും വർക്കലയിൽ നോർവേ സ്വദേശിയായ വിദേശ വനിതയ്ക്ക് നേരെ അതിക്രമം റിപ്പോർട്ട് ചെയ്തിരുന്നു. വിനോദസഞ്ചാര കേന്ദ്രങ്ങളിൽ വിദേശികൾക്ക് നേരെയുണ്ടാകുന്ന ഇത്തരം സംഭവങ്ങൾ ഗൗരവത്തോടെയാണ് പോലീസ് കാണുന്നത്.
