ന്യൂദല്ഹി: വനിതാ സംവരണ ബില് നടപ്പാക്കുന്നതിന് നിര്ണായക നീക്കവുമായി കേന്ദ്രസര്ക്കാര്. മണ്ഡല പുനര്നിര്ണയത്തിലുള്ള കാലതാമസം ഒഴിവാക്കാന് 2011ലെ സെന്സസ് അടിസ്ഥാനമാക്കി സീറ്റുകളുടെ എണ്ണം വര്ദ്ധിപ്പിക്കാനാണ് കേന്ദ്രത്തിന്റെ പുതിയ നീക്കം. ഇതിനായി കേന്ദ്ര ആഭ്യന്തരമന്ത്രി അമിത് ഷാ വിവിധ കക്ഷി നേതാക്കളുമായി ചര്ച്ച നടത്തി.
കേന്ദ്രനിര്ദേശം അംഗീകരിച്ചാല് ബില് പാസാക്കുന്നതിനായി പാര്ലമെന്റ് സമ്മേളനം നീട്ടാനാണ് സര്ക്കാര് തീരുമാനം ഓരോ സംസ്ഥാനത്തെയും സീറ്റുകളില് 50 ശതമാനത്തിന്റെ വര്ദ്ധനവാണ് ലക്ഷ്യമിടുന്നത്. ആകെ സീറ്റുകളുടെ മൂന്നിലൊന്ന് വനിതകള്ക്കായി സംവരണം ചെയ്യും. ഇത് നടപ്പായാല് നിലവിലെ 543 ലോക്സഭാ സീറ്റുകള് 816 ആയി ഉയരും. 273 സീറ്റുകള് വനിതകള്ക്കായി സംവരണം ചെയ്യപ്പെടും. കേരളത്തില് ലോക്സഭാ സീറ്റുകള് മുപ്പതായും നിയമസഭാ സീറ്റുകള് 210 ആയും ഉയരും. സംവരണ സീറ്റുകള് നിശ്ചയിക്കുന്നതിന് നറുക്കെടുപ്പ് രീതി അവലംബിക്കും.
നാരീ ശക്തി വന്ദന് നിയമപ്രകാരം 2026 ലെ സെന്സസും അതിനുശേഷമുള്ള മണ്ഡല പുനര്നിര്ണയവുമനുസരിച്ച് വനിതാ സംവരണ സീറ്റുകള് നിശ്ചയിക്കാനായിരുന്നു തീരുമാനം. ഈ കാലതാമസം ഒഴിവാക്കണമെന്ന പ്രധാനമന്ത്രി നരേന്ദ്രമോദിയുടെ നിര്ദ്ദേശപ്രകാരമാണ് പുതിയ ഭേദഗതി നീക്കം.
