ഗുരുവായൂര്: 2026 മാര്ച്ച് മാസത്തിലെ ക്ഷേത്ര ഭണ്ഡാര വരവ് കണക്കുകള് പുറത്തുവന്നു.5.79 കോടി രൂപയാണ് ഭണ്ഡാരത്തിലൂടെ ലഭിച്ചത്.സ്വര്ണവും വെള്ളിയും നിരോധിച്ച കറന്സികളും ഭണ്ഡാരത്തില് നിന്ന് ലഭിച്ചു. ശനിയാഴ്ച വൈകിട്ടോടെ കണക്കുകള് തിട്ടപ്പെടുത്തിയപ്പോള് ആകെ ലഭിച്ചത് 5,79,94,024 രൂപയാണ് .സൗത്ത് ഇന്ത്യന് ബാങ്ക് ഗുരുവായൂര് ശാഖയുടെ മേല്നോട്ടത്തിലായിരുന്നു എണ്ണിയത്.
വലിയ തോതില് സ്വര്ണവും വെള്ളിയും ഭക്തര് വഴിപാടായി സമര്പ്പിച്ചിട്ടുണ്ട്.ഒരു കിലോ 282 ഗ്രാം സ്വര്ണവും 15 കിലോ 410 ഗ്രാം വെള്ളിയും ലഭിച്ചു. ഭണ്ഡാരത്തില് നിന്ന് പഴയതും നിരോധിച്ചതുമായ നോട്ടുകളും ലഭിച്ചു. 2000 രൂപയുടെ എട്ട് നോട്ടുകളും നേരത്തെ നിരോധിച്ച 1000 രൂപയുടെ മൂന്ന് നോട്ടുകളും ലഭിച്ചു.നിരോധിച്ച 500 രൂപയുടെ 20 നോട്ടുകളും ലഭിച്ചിട്ടുണ്ട്.
ഡിജിറ്റല് പണമിടപാടുകള്ക്കായി ക്ഷേത്രത്തിന്റെ വിവിധ ഭാഗങ്ങളില് സ്ഥാപിച്ചിട്ടുള്ള ഇ-ഭണ്ഡാരങ്ങള് വഴിയും വരവുണ്ടായി. എസ്.ബി.ഐ (കിഴക്കേ നട) 2,00,246 രൂപ, ധനലക്ഷ്മി ബാങ്ക് 1,21,497 രൂപ, യു.ബി.ഐ (പടിഞ്ഞാറെ നട) 71,157 രൂപ, പഞ്ചാബ് നാഷണല് ബാങ്ക് (കിഴക്കേ നട) 65,839 രൂപ, ഐസിഐസിഐ ബാങ്ക് 41,224 രൂപ, ഇന്ത്യന് ബാങ്ക് 6,162 രൂപ എന്നിങ്ങനെയും നടവരവ് ലഭിച്ചു.
