കൊൽക്കത്ത ; 2026-ലെ പശ്ചിമ ബംഗാൾ നിയമസഭാ തെരഞ്ഞെടുപ്പിനുള്ള ആദ്യ സ്ഥാനാർത്ഥി പട്ടിക ബിജെപി പുറത്തിറക്കി. ആകെ 144 സ്ഥാനാർത്ഥികളുടെ പേരുകൾ പ്രഖ്യാപിച്ചു. ഈ പട്ടികയിൽ ഏറെ ചർച്ച ചെയ്യപ്പെടുന്നത് ഭബാനിപൂർ, നന്ദിഗ്രാം മണ്ഡലങ്ങളാണ്. പ്രതിപക്ഷ നേതാവ് സുവേന്ദു അധികാരിയാണ് ഇവിടെ മത്സരിക്കുന്നത്.
ഭബാനിപൂർ സീറ്റ് നിലവിൽ മുഖ്യമന്ത്രി മമത ബാനർജിയാണ് പ്രതിനിധീകരിക്കുന്നത് . 2021-ൽ നന്ദിഗ്രാമിൽ നിന്ന് പരാജയപ്പെട്ടതിന് ശേഷം, ഈ മണ്ഡലത്തിൽ നിന്നുള്ള ഉപതിരഞ്ഞെടുപ്പിൽ വിജയിച്ച് മമത ബാനർജി മുഖ്യമന്ത്രി സ്ഥാനം ഏറ്റെടുത്തു. ഇപ്പോൾ ഈ മണ്ഡലത്തിൽ, സുവേന്ദു അധികാരിയും മമത ബാനർജിയും തമ്മിലുള്ള മത്സരം ഇത്തവണ ബംഗാളിലെ ഏറ്റവും ഉയർന്ന തിരഞ്ഞെടുപ്പ് പോരാട്ടമായി മാറും.
2021 ലെ നിയമസഭാ തെരഞ്ഞെടുപ്പിൽ നന്ദിഗ്രാം മണ്ഡലത്തിൽ സുവേന്ദു അധികാരി മുഖ്യമന്ത്രി മമത ബാനർജിയെ ഏകദേശം 2,000 വോട്ടുകളുടെ ഭൂരിപക്ഷത്തിൽ പരാജയപ്പെടുത്തിയിരിന്നു . 17 റൗണ്ട് വോട്ടെണ്ണലിന് ശേഷമാണ് സുവേന്ദു അധികാരിയുടെ വിജയം പ്രഖ്യാപിച്ചത്. അന്ന്, ബിജെപി തിരഞ്ഞെടുപ്പ് പ്രക്രിയയിൽ കൃത്രിമം കാണിച്ചുവെന്ന് മമത ബാനർജി ആരോപിച്ചിരുന്നു. ആ പരാജയത്തെത്തുടർന്ന്, ഭബാനിപൂർ സീറ്റിൽ നിന്ന് ഉപതെരഞ്ഞെടുപ്പിൽ മത്സരിച്ച് മമത വിജയം നേടി. ഇപ്പോൾ, മമത ബാനർജിയെ വീണ്ടും തോൽപ്പിക്കാനുള്ള ഉത്തരവാദിത്തമാണ് ബിജെപി സുവേന്ദു അധികാരിയെ ഏൽപ്പിച്ചിരിക്കുന്നത്.
