സമാല്ഖ (ഹരിയാന): സംഘവികാസം എന്നാല് ദേശീയ ആശയങ്ങളുടെ വ്യാപനം എന്നാണ് അര്ത്ഥമെന്ന് ആര്എസ്എസ് സര്കാര്യവാഹ് ദത്താത്രേയ ഹൊസബാളെ. അഖില ഭാരതീയ പ്രതിനിധിസഭയുടെ സമാപനദിവസം വാര്ത്താസമ്മേളനത്തില് സംസാരിക്കുകയായിരുന്നു അദ്ദേഹം. കൊളോണിയല് മനോഭാവത്തില് നിന്ന് പൗരന്മാര് മുക്തരാകേണ്ടത് അനിവാര്യമാണ്. മുഴുവന് ലോകത്തിന്റെയും ക്ഷേമമാണ് ഭാരതം ആഗ്രഹിക്കുന്നതെന്നും അദ്ദേഹം പറഞ്ഞു.
പോയവര്ഷം ഏകദേശം ആറായിരം ശാഖകളുടെ വര്ദ്ധനവുണ്ടായെന്ന് ദത്താത്രേയ ഹൊസബാളെ ചൂണ്ടിക്കാട്ടി. 55,683 സ്ഥലങ്ങളിലായി 88,949 ശാഖകളാണ് ഉള്ളത്. ആന്ഡമാന്, അരുണാചല്പ്രദേശ്, ലേ, വിദൂര ഗോത്രവര്ഗ മേഖലകള് തുടങ്ങി ഇതുവരെ എത്താത്ത ഇടങ്ങളിലും സംഘശാഖകള് ഇപ്പോഴുണ്ട്. എണ്ണത്തില് മാത്രമല്ല ഗുണാത്മക വികാസം ലക്ഷ്യമിട്ടും സംഘം തുടര്ച്ചയായി പ്രവര്ത്തിക്കുന്നു. പഞ്ചപരിവര്ത്തനത്തിലൂടെ സമൂഹത്തില് ഭാവാത്മക മാറ്റത്തിന് പ്രചോദനം നല്കേണ്ടതുണ്ട്. ഭാരതീയത അഥവാ ഹിന്ദുത്വം എന്നത് വെറുമൊരു ആശയമല്ല, മറിച്ച് ജീവിതരീതിയാണ്. അതിലൂടെ സമൂഹത്തിന്റെ ഗുണനിലവാരം വളര്ത്തണം. അതിനായി സജ്ജനങ്ങളെ ഒരുമിച്ചു ചേര്ത്ത് ദേശീയ താത്പര്യത്തിനായി പ്രവര്ത്തിക്കാന് സജ്ജരാക്കണം. ജാതി, വര്ഗ വ്യത്യാസങ്ങള്ക്കപ്പുറം മഹാപുരുഷന്മാരെ അംഗീകരിക്കുകയും അവരിലൂടെ സമൂഹം നല്ല മാറ്റത്തിനായി മുന്നോട്ട് പോകുകയും വേണമെന്നും ദത്താത്രേയ ഹൊസബാളെ പറഞ്ഞു.
ഗുരുതേജ് ബഹാദൂറിന്റെ 350-ാം ബലിദാന വാര്ഷികത്തോടനുബന്ധിച്ച് സ്വയംസേവകര് രാജ്യത്തുടനീളം രണ്ടായിരത്തിലധികം പരിപാടികള് സംഘടിപ്പിച്ചു, അതില് ഏഴ് ലക്ഷത്തിലധികം പേര് പങ്കെടുത്തു. വന്ദേമാതരത്തിന്റെ 150-ാം വാര്ഷികവും ആഘോഷിച്ചു. വരും വര്ഷത്തില്, സന്ത് ശിരോമണി രവിദാസ് മഹാരാജിന്റെ 650-ാം ജന്മവാര്ഷികത്തോടനുബന്ധിച്ച് പരിപാടികള് ആസൂത്രണം ചെയ്തിട്ടുണ്ട്. ഗോസേവ, ഗ്രാമവികാസം എന്നീ പ്രവര്ത്തനങ്ങളും പ്രതിനിധിസഭ ചര്ച്ച ചെയ്തു. നിലവിലെ ആഗോള സാഹചര്യത്തില് ദേശീയ താത്പര്യത്തിനായി കേന്ദ്ര സര്ക്കാര് നടത്തുന്ന നയതന്ത്ര ശ്രമങ്ങള് ശ്ലാഘനീയമാണെന്നും സര്കാര്യവാഹ് കൂട്ടിച്ചേര്ത്തു. അഖില ഭാരതീയ പ്രചാര്പ്രമുഖ് സുനില് ആംബേക്കറും വാര്ത്താ സമ്മേളനത്തില് പങ്കെടുത്തു.
ജന്മഭൂമി ഓണ്ലൈന്