തിരുവനന്തപുരം: വാണിജ്യ പാചക വാതക സിലിണ്ടര് വിതരണത്തിന് നിയന്ത്രണം ഏര്പ്പെടുത്തിയ സാഹചര്യത്തില് സംസ്ഥാനത്ത് വാര് റൂം പ്രവര്ത്തനം ആരംഭിച്ചു. സിവില് സപ്ലൈസ് കമ്മീഷണറേറ്റിലാണ് വാര് റൂം സജ്ജമാക്കിയിരിക്കുന്നത്.എണ്ണ കമ്പനികളുമായി മുഖ്യമന്ത്രിയും ഭക്ഷ്യമന്ത്രിയും സംസാരിച്ചു. കരിഞ്ചന്തയും പൂഴ്ത്തിവെപ്പും തടയാന് സ്ക്വാഡുകള് രൂപീകരിച്ച് പരിശോധന തുടങ്ങി.
ഉപഭോക്തൃ സംസ്ഥാനമായ കേരളത്തിലെ സാഹചര്യം പരിഗണിച്ച് വാണിജ്യ ആവശ്യത്തിനുള്ള സിലണ്ടര് വിതരണത്തിലെ നിയന്ത്രണത്തില് ഇളവുകള് നല്കണമെന്ന് കമ്പനികളോട് സംസ്ഥാന സര്ക്കാര് ആവശ്യപ്പെട്ടു. ഇക്കാര്യം അഭ്യര്ത്ഥിച്ച് കേന്ദ്ര പെട്രോളിയം പ്രകൃതിവാതക വകുപ്പ് മന്ത്രി ഹര്ദീപ് സിംഗ് പുരിക്ക് മന്ത്രി ജി.ആര്. അനില് കത്ത് നല്കി.
വൃദ്ധസദനങ്ങള്, ആശുപത്രികള്, അനാഥാലയങ്ങള്, സ്കൂളുകള്, ജനകീയ / സുഭിക്ഷാ ഹോട്ടലുകള് എന്നിവിടങ്ങളിലും സ്കൂള്, കോളേജ് ഹോസ്റ്റലുകളിലും ഹോസ്റ്റലുകളോട് ചേര്ന്നുള്ള ഹോട്ടലുകളിലും ഗസ്റ്റ് ഹൗസുകള്, സര്ക്കാര് പൊതുമേഖല ഓഫീസ് ക്യാമ്പസിലെ ക്യാന്റീനുകള് എന്നിവയിലും മുന്ഗണന നല്കി വാണിജ്യ ആവശ്യത്തിനുള്ള സിലിണ്ടറുകള് വിതരണം ചെയ്യാന് തയാറാകണമെന്നാണ് സര്ക്കാരിന്റെ അഭ്യര്ത്ഥന . ആവശ്യം പരിഗണിക്കാമെന്ന് എണ്ണ കമ്പനികള് അറിയിച്ചു.
