പാനിപ്പത്ത് (ഹരിയാന) : ആര്എസ്എസ് അഖില ഭാരതീയ പ്രതിനിധി സഭ
13, 14, 15 തീയതികളില് സമാല്ഖയിലെ മാധവ സൃഷ്ടിയില് ചേരും. രാജ്യത്തുടനീളമുള്ള 1487 പ്രതിനിധികള് പങ്കെടുക്കും.സംഘശതാബ്ദി പ്രവര്ത്തനങ്ങള്, സാമൂഹിക വിഷയങ്ങള്, സംഘടനാ വികാസം എന്നിവ യോഗം ചര്ച്ച ചെയ്യുമെന്ന് അഖില ഭാരതീയ പ്രചാര് പ്രമുഖ് സുനില് ആംബേക്കര് വാര്ത്താ സമ്മേളനത്തില് അറിയിച്ചു.
13ന് രാവിലെ 9 ന് സര്സംഘചാലക് ഡോ. മോഹന്റാവു ഭാഗവതിന്റെ സാന്നിധ്യത്തില് ചേരുന്ന സഭയില് സര്കാര്യവാഹ് ദത്താത്രേയ ഹൊസബാളെ അധ്യക്ഷത വഹിക്കും. സംഘത്തിന്റെ അഖില ഭാരതീയ ചുമതലക്കാര്, ക്ഷേത്ര-പ്രാന്ത സംഘചാലകര്, കാര്യവാഹുമാര്, പ്രചാരകര് എന്നിവരെ കൂടാതെ ഭാരതീയ മസ്ദൂര് സംഘം, വിശ്വഹിന്ദു പരിഷത്ത്, സേവാ ഭാരതി, അഖില ഭാരതീയ വിദ്യാര്ത്ഥി പരിഷത്ത്, ഭാരതീയ കിസാന് സംഘം, ഭാരതീയ ജനതാ പാര്ട്ടി, രാഷ്ട്ര സേവിക സമിതി തുടങ്ങിയവയടക്കം 32 വിവിധ ക്ഷേത്ര സംഘടനകളുടെ ഉയര്ന്ന ചുമതലയുള്ളവരും പ്രതിനിധി സഭയില് പങ്കെടുക്കും.
നിലവില് രാജ്യത്തുടനീളം സംഘ ശതാബ്ദി പ്രവര്ത്തനങ്ങള് നടന്നുവരികയാണെന്ന് അദ്ദേഹം പറഞ്ഞു. യോഗത്തില് ഈ പരിപാടികളുടെ അവലോകനവും ചര്ച്ചയുമുണ്ടാകും. ശതാബ്ദി ഗൃഹസമ്പര്ക്ക പരിപാടിയിലൂടെ രാജ്യത്തുടനീളമുള്ള 10 കോടിയിലധികം വീടുകളില് എത്തിച്ചേരാന് സാധിച്ചു. തുടര് ദിവസങ്ങളില് മറ്റ് പ്രാന്തങ്ങളിലും സമ്പര്ക്കം തുടരും, അദ്ദേഹം കൂട്ടിച്ചേര്ത്തു.
സന്ത് ശിരോമണി രവിദാസിന്റെ 650-ാം ജയന്തി വര്ഷ പരിപാടികളെക്കുറിച്ചും യോഗത്തില് ചര്ച്ച നടക്കും. ഫെബ്രുവരി 1 മുതല് അടുത്ത വര്ഷം ഫെബ്രുവരി 20 വരെ രാജ്യത്തുടനീളം ഈ പരിപാടികള് സാമാജിക സമരസതാ സന്ദേശത്തോടെ സംഘടിപ്പിക്കും.
രാജ്യത്തിന്റെ വിവിധ ഭാഗങ്ങളില് നിന്നെത്തുന പ്രവര്ത്തകര് അതാത് മേഖലകളിലെ സാമൂഹിക, സാംസ്കാരിക അനുഭവങ്ങള് പങ്കുവെക്കും. ഇതിന്റെ അടിസ്ഥാനത്തില് നിലവിലെ സാമൂഹിക സാഹചര്യങ്ങള് യോഗം ചര്ച്ച ചെയ്യും.
ഒരു വര്ഷത്തിനിടെ രാജ്യത്തുടനീളം 5500-ലധികം പുതിയ ശാഖകള് ആരംഭിച്ചതായി അദ്ദേഹം പറഞ്ഞു. കൂടാതെ, ഡിജിറ്റല് പ്ലാറ്റ്ഫോമുകളിലും സംഘവുമായി ബന്ധപ്പെടാനുള്ള താല്പര്യം വര്ദ്ധിച്ചുവരികയാണ്. ഓരോ വര്ഷവും ഏകദേശം 1.25 ലക്ഷം ആളുകള് ‘ജോയിന് ആര്എസ്എസ്’ വഴി സംഘത്തില് ചേരാന് താല്പര്യം പ്രകടിപ്പിക്കുന്നുണ്ട്.
ഈ വര്ഷം രാജ്യത്തുടനീളം 97 പരിശീലന വര്ഗുകള് സംഘടിപ്പിക്കുമെന്നും സുനില് ആംബേക്കര് പറഞ്ഞു.
വാര്ത്താ സമ്മേളനത്തില് ഉത്തര ക്ഷേത്ര സംഘചാലക് പവന് ജിന്ഡാലും പങ്കെടുത്തു.
