കണ്ണൂര്: ഏപ്രില് ഒന്നു മുതല് സംസ്ഥാനത്തെ എല്ലാ ജയിലുകളിലും മത്സ്യഫെഡ് മത്സ്യമെത്തിക്കും. 57 ജയിലുകളിലേക്കും മത്സ്യമെത്തിക്കാന് ജയില് വകുപ്പും മത്സ്യഫെഡും ധാരണയിലെത്തി. തടവുകാര്ക്കുള്ള ഭക്ഷണ മെനുവില് ആഴ്ചയില് 2 ദിവസം മത്സ്യവിഭവമുണ്ട്.
ഇപ്പോള് പ്രാദേശികമായാണ് മത്സ്യം വാങ്ങുന്നത്. ലഭ്യതക്കുറവുണ്ടെങ്കില് ചിലപ്പോള് മത്സ്യം കിട്ടില്ല. മത്സ്യഫെഡുമായി ധാരണ ആയതോടെ മത്സ്യം ഹാര്ബറില്നിന്നു നേരിട്ട് ജയിലുകളിലെത്തിക്കും.അടുത്തിടെ വാങ്ങിയ ശീതീകരണ സൗകര്യമുള്ള എട്ട് വാഹനങ്ങള് വിതരണത്തിനായി മത്സ്യഫെഡ് ഉപയോഗപ്പെടുത്തും.
25 മത്സ്യങ്ങളുടെ പട്ടിക മത്സ്യഫെഡ് ജയില് വകുപ്പിനു നല്കി.ഇതില് മത്തി, അയല, ചൂര എന്നിവ അംഗീകരിച്ചു.ഇവ കറിക്കഷണങ്ങളാക്കിയാണ് ജയിലിലെത്തിക്കുക.ജയില് കൗണ്ടറിലേക്ക് മീന് അച്ചാര്, ഉണക്കച്ചെമ്മീന് അച്ചാര് എന്നിവയും മത്സ്യഫെഡ് നല്കും.പൊതുജനത്തിന് ഇവ വാങ്ങാനാകും.
