പാലക്കാട്: നിയമസഭാ തെരഞ്ഞെടുപ്പ് അടുത്തിരിക്കെ മുന് എംഎല്എ വി.ടി. ബല്റാമിനെതിരെ തൃത്താലയില് പടയൊരുക്കം. ബല്റാമിന്റെ ഏകപക്ഷീയമായ നിലപാടുകളില് പ്രതിഷേധിച്ചാണ് ഒരുവിഭാഗം രംഗത്തെത്തിയിരിക്കുന്നത്. ബല്റാം ഗ്രൂപ്പ് അടിസ്ഥാനത്തില് മാത്രം പ്രവര്ത്തിക്കുന്നുവെന്നാരോപിച്ച് ചില നേതാക്കളുടെ നേതൃത്വത്തില് കഴിഞ്ഞദിവസം യോഗം ചേര്ന്നിരുന്നു. കെ. കരുണാകരന് ഫൗണ്ടേഷന് എന്ന പേരില് പുതിയ ഗ്രൂപ്പ് രൂപീകരണവും നടന്നതായി അറിയുന്നു.
തൃത്താലയില് മുന് ഡിസിസി പ്രസിഡന്റ് സി.വി. ബാലചന്ദ്രനും, വി.ടി. ബല്റാമും വെടിനിര്ത്തല് പ്രഖ്യാപിച്ച് സമവായത്തിലെത്തിയതിന് പിന്നാലെയാണ് ബല്റാമിനെതിരെ ഒരുവിഭാഗം രംഗത്തെത്തിയത്. സി.വി. ബാലചന്ദ്രന്റെ പിന്നില് നിന്നിരുന്ന ഐ വിഭാഗത്തിലെയും, എ വിഭാഗത്തിലെയും മുപ്പതിലധികം ഭാരവാഹികള് ചേര്ന്നാണ് കെ. കരുണാകരന് ഫൗണ്ടേഷന് രൂപീകരിച്ചിരിക്കുന്നത്.
യൂത്ത് കോണ്ഗ്രസ് മണ്ഡലം പ്രസിഡന്റ്, സംസ്ഥാന സെക്രട്ടറി, അഞ്ച് ഡിസിസി സെക്രട്ടറിമാര്, ബ്ലോക്ക് സെക്രട്ടറിമാര്, പ്രസിഡന്റുമാര്, പഴയകാലനേതാക്കള് എന്നിവര് പങ്കെടുത്തത് നേതൃത്വത്തെ ഞെട്ടിച്ചിരിക്കുകയാണ്. ഡിസിസി വൈസ് പ്രസിഡന്റാണ് യോഗം ഉദ്ഘാടനം ചെയ്തതെന്ന് പറയുന്നു.
തദ്ദേശ തെരഞ്ഞെടുപ്പില് ഏകാധിപത്യ രീതിയിലായിരുന്നു ബല്റാം പ്രവര്ത്തിച്ചതെന്ന് ഇവര് ആരോപിച്ചു. സ്ഥാനാര്ത്ഥി നിര്ണയത്തിലും പഞ്ചായത്ത് പ്രസിഡന്റുമാരെ നിയമിക്കുന്നതിലും അദ്ദേഹത്തിന്റെ ഇടപെടലുണ്ടായതും ഒരു വിഭാഗത്തെ ചൊടിപ്പിച്ചിരുന്നു.
