കൊച്ചി : ട്വന്റി ട്വന്റി കോര്ഡിനേറ്റര് സാബു എം ജേക്കബിന് എതിരായ വാര്ത്തകള് നല്കുന്നതില് നിന്ന് റിപ്പോര്ട്ടര് ടിവിയെ വിലക്കി കോടതി. കേസ് അവസാനിക്കുന്നത് വരെ സാബു എം ജേക്കബിനെ അപകീര്ത്തിപ്പെടുത്തുന്ന വാര്ത്തകള് നല്കരുതെന്ന് പെരുമ്പാവൂര് സബ് കോടതി ഉത്തരവിട്ടു. വാര്ത്തയില് പ്രഥമ ദൃഷ്ട്യാ അപകീര്ത്തിപരമായ പരാമര്ശങ്ങള് ഉണ്ടെന്ന് കോടതി നിരീക്ഷിച്ചു.
ട്വന്റി-20യുടെ എന്ഡിഎ പ്രവേശനം ഇഡിയില് നിന്ന് രക്ഷപെടാന് എന്ന വാര്ത്തയെ തുടര്ന്നാണ് സാബു എം ജേക്കബ് കോടതിയെ സമീപിച്ചത്. ഒന്നു മുതല് 17 വരെയുള്ള പ്രതികള്ക്ക് നോട്ടീസ് അയച്ചു. 25 കോടി രൂപ നഷ്ടപരിഹാരം ആവശ്യപ്പെട്ടാണ് സാബു എം ജേക്കബ് കോടതിയെ സമീപിച്ചത്. ചാനല് ഉടമ ആന്റോ അഗസ്റ്റിന് ഉള്പ്പടെയുള്ളര്ക്ക് ഇതുമായി ബന്ധപ്പെട്ട് നോട്ടീസ് അയച്ചു.
വ്യാജ വാര്ത്ത സൃഷ്ടിച്ച് മനപൂര്വം ഉപദ്രവിക്കാനാണ് റിപ്പോര്ട്ടര് ചാനലിന്റെ ശ്രമമെന്ന് നേരത്തെ സാബു എം ജേക്കബ് ആരോപിച്ചിരുന്നു. ന്യൂസ് ചാനല് കൈയ്യില് ഉണ്ടെന്ന് കരുതി ആരെയും കരിവാരി തേക്കാം എന്ന ചിന്ത മാറണം.റിപ്പോര്ട്ടര് ചാനല് പ്രവര്ത്തിക്കുന്നത് ലൈസന്സ് ഇല്ലാതെയാണ്. ബ്രോഡ്കാസ്റ്റിംഗ് സര്ട്ടിഫിക്കറ്റ് റിപ്പോര്ട്ടര് പുറത്ത് വിടണം. റിപ്പോര്ട്ടര് ചാനലിനെതിരെ കേന്ദ്ര വാര്ത്താവിതരണമന്ത്രാലയത്തിന് പരാതി നല്കിയിട്ടുണ്ടെന്നും സാബു എം ജേക്കബ് പറയുകയുണ്ടായി.
