ദീസ്പുര്: തെരഞ്ഞെടുപ്പ് അടുത്തിരിക്കെ ആസാമില് കോണ്ഗ്രസ് പാര്ട്ടിയില് അസ്വാരസ്യങ്ങള് പുകയുന്നു. കോണ്ഗ്രസില് പ്രവര്ത്തിക്കുന്നതില് ആത്മാഭിമാനത്തിന്റെ പ്രശ്നമുണ്ടെന്ന് ചൂണ്ടിക്കാട്ടി മുന് സംസ്ഥാന അധ്യക്ഷന് ഭൂപന് ബോറ പാര്ട്ടിയില് നിന്ന് രാജി പ്രഖ്യാപിച്ചശേഷം മണിക്കൂറുകള്ക്കുള്ളില് പിന്വലിച്ചു. നിയമസഭാ തെരഞ്ഞെടുപ്പില് മുന്നണി ചര്ച്ചകള് നടത്താന് കേന്ദ്രനേതൃത്വം ഭൂപന് ബോറയ്ക്ക് ചുമതല നല്കിയതിന് പിന്നാലെയാണ് രാജി പ്രഖ്യാപനം.
തിങ്കളാഴ്ച രാവിലെ 8 മണിയോടെയാണ് അദ്ദേഹം പാര്ട്ടി കേന്ദ്ര നേതൃത്വത്തിന് രാജി സമര്പ്പിച്ചത്. പിന്നാലെ പാര്ട്ടിയുടെ പ്രവര്ത്തന രീതി ശരിയല്ലെന്ന് പറഞ്ഞ ഭൂപന് ബോറ പരസ്യമായി രംഗത്തെത്തുകയും ചെയ്തു. ഇതോടെ പാര്ട്ടി അധ്യക്ഷന് മല്ലികാര്ജുന് ഖാര്ഗെയും ലോക്സഭാ പ്രതിപക്ഷ നേതാവ് രാഹുല് ഗാന്ധിയും പിസിസി അധ്യക്ഷന് ഗൗരവ് ഗൊഗോയിയും നേരിട്ട് വിളിച്ച് സംസാരിക്കുകയായിരുന്നു. പ്രശ്നങ്ങള് പരിഹരിക്കാന് കൂടുതല് സമയം അനുവദിക്കണമെന്ന് കോണ്ഗ്രസ് നേതൃത്വം ബോറയോട് അഭ്യര്ത്ഥിച്ചു. ഇതിന് ശേഷം നടന്ന അനുനയ നീക്കങ്ങള്ക്ക് പിന്നാലെയാണ് ഭൂപന് ബോറ രാജി പിന്വലിച്ചത്.
കഴിഞ്ഞ വര്ഷം ജൂണില് ഗൗരവ് ഗൊഗോയി ചുമതലയേല്ക്കുന്നതുവരെ സംസ്ഥാന കോണ്ഗ്രസ് ഘടകത്തിന്റെ അധ്യക്ഷനായിരുന്നു ബോറ.
2006 മുതല് 2016 വരെ ബിഹ്പുരിയ മണ്ഡലത്തില് നിന്ന് രണ്ട് തവണ എംഎല്എയായിരുന്നു ഭൂപന് ബോറ. 2021ല് സംസ്ഥാന തെരഞ്ഞെടുപ്പില് പാര്ട്ടിക്ക് തിരിച്ചടിയേറ്റതിന് ശേഷം അസം പ്രദേശ് കോണ്ഗ്രസ് കമ്മിറ്റിയുടെ അധ്യക്ഷനായി നിയമിതനായി. 1994 മുതല് കോണ്ഗ്രസ് പാര്ട്ടിയില് പ്രവര്ത്തിച്ച് വരികയാണ് ഭൂപന് ബോറ.
