കോട്ടയം: മന്ത്രി റോഷി അഗസ്റ്റിനല്ല, പാര്ട്ടിയെന്ന് വ്യക്തമാക്കി കേരള കോണ്ഗ്രസ് നേതാവ് ജോസ് കെ. മാണി. നിയമസഭാ തെരഞ്ഞെടുപ്പില് താന് പാലായില് മത്സരിക്കണോ വേണ്ടയോ എന്ന കാര്യം പാര്ട്ടിയാണ് തീരുമാനിക്കുന്നതെന്നും തനിക്ക് പോലും അത് പറയാന് കഴിയില്ലെന്നുമുള്ള ജോസ് കെ മാണിയുടെ വിശദീകരണത്തിന്റെ അര്ത്ഥമതാണ്. പാലായില് ജോസ് കെ. മാണി മത്സരിക്കുമെന്ന റോഷി അഗസ്റ്റിന് പ്രഖ്യാപിച്ചതിനോടു പ്രതികരിക്കുകയായിരുന്നു ജോസ്.
മന്ത്രി റോഷി അഗസ്റ്റിന് പറഞ്ഞത് തനിക്ക് സുഖിച്ചെന്നും ജോസ് പറഞ്ഞു. എല്ഡിഎഫ് മദ്ധ്യമേഖലാ വികസന മുന്നേറ്റ ജാഥയുടെ ഇടുക്കിയിലെ പര്യടനത്തിനിടെ അടിമാലിയിലെ വാര്ത്താസമ്മേളനത്തിലായിരുന്നു ജോസ് കെ മാണി പാലായില് മത്സരിക്കുമെന്ന് റോഷി പ്രഖ്യാപിച്ചത്.
അതേസമയം പാലായില് മാണി വിഭാഗത്തിന് ജയസാധ്യത ഇല്ലാതിരിക്കെ, പാര്ട്ടി തീരുമാനം വരും മുന്പ് ജോസ് കെ. മാണിയെ പാലായിലെ തെരഞ്ഞെടുപ്പ് ഗോദയിലേക്കു തള്ളിയിട്ടതിനെതിരെ റോഷിക്കെതിരെ പാര്ട്ടിയില് അമര്ഷം പുകയുകയാണ്. ജോസിനെ ഒരിക്കല്ക്കൂടി പരാജയപ്പെടുത്തി മൂലക്കിരുത്താനും പാര്ട്ടിയെ കൈപ്പിടിയിലൊതുക്കാനുമാണ് റോഷി കച്ചകെട്ടുന്നതെന്നാണ് ആക്ഷേപം. മുഖ്യമന്ത്രി പിണറായി വിജയന്റെ അനുഗ്രഹാശിസുകളോടെയാണ് റോഷി പാര്ട്ടി പിടിക്കാന് ഇറങ്ങിയിരിക്കുന്നതെന്നും വിമര്ശനമുയരുന്നു. ഇടതു മുന്നണി വിടില്ലെന്ന് ജോസ് കെ. മാണി പ്രഖ്യാപിച്ചെങ്കിലും സിപിഎം അതു വിശ്വസിച്ചിട്ടില്ല. നിയമസഭാ തെരഞ്ഞെടുപ്പിനു തൊട്ടുമുന്പ് ജോസ് യു.ഡി.എഫില് ചേക്കേറുമെന്നു തന്നെയാണ് കരുതപ്പെടുന്നത്. അങ്ങിനെയെങ്കില് റോഷിയെ മുന്നില് നിറുത്തി പാര്ട്ടി പിളര്ത്താനാണ് പിണറായി ലക്ഷ്യമിടുന്നത്.
