തിരുവനന്തപുരം: സംസ്ഥാന സര്ക്കാര് 1,000 കോടി രൂപ കടമെടുക്കുന്നു.
സംസ്ഥാനത്തിന്റെ വികസനപ്രവര്ത്തനങ്ങളുടെ ധനശേഖരണാര്ത്ഥമാണ് 1,000 കോടി രൂപയുടെ കടപ്പത്രം പുറപ്പെടുവിക്കുന്നതെന്നാണ് വിശദീകരണം. എന്നാല് ജീവനക്കാരുടെ ശമ്പളവും പെന്ഷനും മുടങ്ങുന്ന സാഹചര്യം ഒഴിവാക്കുകയാണ് മുഖ്യ ആവശ്യമെന്നാണ് സൂചന. കടപ്പത്രത്തിനായുള്ള ലേലം ഫെബ്രുവരി 3ന് റിസര്വ് ബാങ്കിന്റെ മുംബൈ ഫോര്ട്ട് ഓഫീസില് ഇ-കുബേര് സംവിധാനം വഴി നടക്കും. ലേലം സംബന്ധിച്ച വിജ്ഞാപനത്തിനും വിശദാംശങ്ങള്ക്കും ധനവകുപ്പിന്റെ വെബ്സൈറ്റ് (www.finance.kerala.gov.in) സന്ദര്ശിക്കാം.
നിയമസഭ തിരഞ്ഞെടുപ്പ് നടപടികള് മാര്ച്ചില് തുടങ്ങാനിരിക്കെ സംസ്ഥാനം അപ്രതീക്ഷിത സാമ്പത്തിക പ്രതിസന്ധിയിലേക്ക് കൂപ്പുകുത്തുന്നതായാണ് വിവരം. നികുതി വരുമാനത്തിനു പുറമെ 2,000 കോടി രൂപ കേരളത്തിന് ഓരോ മാസവും അധികമായി ചെലവാകാറുണ്ട്. കടമെടുപ്പിലൂടെയാണ് ഇത് കണ്ടെത്തുന്നത്. സാമ്പത്തികവര്ഷത്തിന്റെ അവസാനത്തില് കരാറുകാര്ക്കും മറ്റും ബില്ല് മാറി നല്കേണ്ടതിനാല് ചെലവ് കുത്തനെ ഉയരും.
