പൗരന്മാര്,അവരുടെ ഭൂതകാലത്തിലെ മഹത്തായ നാഴികക്കല്ലുകളും പൂര്വ്വികരുടെ ശ്രദ്ധേയമായ സംഭാവനകളും സ്മരിക്കുമ്പോള്, അത് പുതിയ തലമുറയെ പ്രചോദിപ്പിക്കുന്നു. ഈ പ്രചോദനം ‘വികസിത ഭാരത’ത്തിലേക്കുള്ള യാത്രയെ കൂടുതല് ത്വരിതപ്പെടുത്തുന്നു. 2026 ആരംഭിച്ചതോടെ, രാജ്യം ഈ നൂറ്റാണ്ടിന്റെ രണ്ടാം ഘട്ടത്തിലേക്ക് കടന്നിരിക്കുന്നു. രാജ്യത്തെ സംബന്ധിച്ചിടത്തോളം, ഈ നൂറ്റാണ്ടിന്റെ ആദ്യ 25 വര്ഷങ്ങള് നിരവധി വിജയങ്ങള്, മഹത്തായ നേട്ടങ്ങള്, അസാധാരണമായ അനുഭവങ്ങള് എന്നിവയാല് അടയാളപ്പെടുത്തിയിരിക്കുന്നു. കഴിഞ്ഞ 10-11 വര്ഷത്തിനിടയില്, ഭാരതം എല്ലാ മേഖലകളിലും അതിന്റെ അടിത്തറ ശക്തിപ്പെടുത്തിയിട്ടുണ്ട്.
ഡോ. അംബേദ്കര് എന്നും സമത്വത്തിനും സാമൂഹിക നീതിക്കും ഊന്നല് നല്കി. നമ്മുടെ ഭരണഘടനയും അതേ മനോഭാവത്തില് നമ്മെ പ്രചോദിപ്പിക്കുന്നു. സാമൂഹിക നീതി എന്നാല് ഓരോ പൗരനും വിവേചനമില്ലാതെ അവകാശങ്ങള് പൂര്ണ്ണമായും വിനിയോഗിക്കാന് കഴിയുക എന്നതാണ്. കഴിഞ്ഞ ദശകത്തില് 25 കോടി പൗരന്മാര് ദാരിദ്ര്യത്തില്. നിന്നും മുക്തരായി. ദരിദ്രരെ ശാക്തീകരിക്കുന്നതിനുള്ള പ്രവര്ത്തനങ്ങള് കൂടുതല് ശക്തിയോടെ മുന്നോട്ട് പോകുന്നു.
ബഹിരാകാശ ടൂറിസം രാജ്യത്തിന്റെ പ്രാപ്യതയ്ക്കപ്പുറമല്ല. ഭാരതത്തിന്റെ യുവ ബഹിരാകാശ സഞ്ചാരി ശുഭാംശു ശുക്ലയുടെ അന്താരാഷ്ട്ര ബഹിരാകാശ നിലയത്തിലേക്കുള്ള സന്ദര്ശനം ഒരു ചരിത്ര യാത്രയുടെ തുടക്കം കുറിച്ചു. വരും വര്ഷങ്ങളില്, ബഹിരാകാശത്ത് ഒരു ഇന്ത്യന് സ്റ്റേഷന് സ്ഥാപിക്കുന്ന വിധത്തില് നമ്മുടെ രാജ്യം മുന്നോട്ട് പോകുന്നു. ഗഗന്യാന് ദൗത്യത്തിലും രാജ്യം ഉത്സാഹപൂര്വ്വം പ്രവര്ത്തിക്കുന്നു.
പതിറ്റാണ്ടുകളായി മുടങ്ങിക്കിടക്കുന്ന പദ്ധതികള് ത്വരിതപ്പെടുത്തുന്നതിനും ഓരോ ഗുണഭോക്താവിനും പദ്ധതികളുടെ ആനുകൂല്യങ്ങള് ലഭ്യമാക്കുന്നതിനുമായി, ‘പ്രഗതി’ എന്ന പേരിലൊരു സംരംഭം ആരംഭിച്ചു. പ്രഗതി വഴി ഏകദേശം 85 ലക്ഷം കോടി രൂപയുടെ പദ്ധതികള് ത്വരിതപ്പെടുത്തുകയും ലക്ഷക്കണക്കിന് കോടി രൂപയുടെ ക്ഷേമ പദ്ധതികള് നടപ്പിലാക്കാന് സഹായിക്കുകയും ചെയ്തു.
കഴിഞ്ഞ 11 വര്ഷത്തിനിടയില്, രാജ്യത്തിന്റെ സാമ്പത്തിക അടിത്തറ ശക്തമായി. വിവിധ ആഗോള പ്രതിസന്ധികള്ക്കിടയിലും, ലോകത്തിലെ ഏറ്റവും വേഗത്തില് വളരുന്ന പ്രധാന സമ്പദ്വ്യവസ്ഥയായി ഭാരതം തുടരുന്നു. പണപ്പെരുപ്പം നിയന്ത്രണവിധേയമാക്കുന്നതില് അതിന്റെ റെക്കോര്ഡ് കൂടുതല് മെച്ചപ്പെടുത്തി. യൂറോപ്യന് യൂണിയനുമായുള്ള സ്വതന്ത്ര വ്യാപാര കരാറിനായുള്ള ചര്ച്ചകള് വിജയകരമായതോടെ ഭാരതത്തിലെ ഉത്പാദന, സേവന മേഖലകള്ക്ക് പ്രചോദനമാവുകയും രാജ്യത്തെ യുവാക്കള്ക്ക് പുതിയ തൊഴിലവസരങ്ങള് സൃഷ്ടിക്കുകയും ചെയ്യും. സര്ക്കാരിന്ന് പരിഷ്കാരങ്ങളുടെ പാതയില് മുന്നോട്ട് പോകുകയാണ്. ഭാവി ആവശ്യങ്ങള്ക്കനുസരിച്ച് പഴയ നിയമങ്ങളും വ്യവസ്ഥകളും തുടര്ച്ചയായി പുതുക്കപ്പെടുന്നു.
ജിഎസ്ടിയിലെ ചരിത്രപരമായ പുതു തലമുറ പരിഷ്കരണം പൗരന്മാര്ക്ക് ഒരു ലക്ഷം കോടി രൂപ ലാഭിക്കുന്നത് ഉറപ്പാക്കി. 2025-ല് ജിഎസ്ടി കുറച്ചതിനെത്തുടര്ന്ന്, ഇരുചക്ര വാഹനങ്ങളുടെ രജിസ്ട്രേഷന് രണ്ട് കോടി കവിഞ്ഞു, ഇത് പുതിയ റെക്കോര്ഡാണ്. ആദായനികുതി നിയമവും പരിഷ്കരിച്ചു. 12 ലക്ഷം രൂപ വരെ വരുമാനമുള്ളവരെ നികുതിയില് നിന്ന് ഒഴിവാക്കാന് ചരിത്രപരമായ തീരുമാനം എടുത്തിട്ടുണ്ട്. ഈ പരിഷ്കാരങ്ങള് ദരിദ്രരും ഇടത്തരക്കാരുമായ കുടുംബങ്ങള്ക്ക് അഭൂതപൂര്വമായ ആനുകൂല്യങ്ങള് നല്കുന്നു. ഇത് രാജ്യത്തിന്റെ സമ്പദ്വ്യവസ്ഥയ്ക്ക് പുതിയ ഉത്തേജനം നല്കുന്നു. രാജ്യത്ത് നിരവധി പുതിയ മേഖലകള് ഉയര്ന്നുവന്നതോടെ, തൊഴിലാളികളുടെ താല്പ്പര്യങ്ങള് സംരക്ഷിക്കുന്നതും ഒരുപോലെ പ്രധാനമാണ്. പുതിയ തൊഴില് നിയമങ്ങള് നടപ്പിലാക്കുന്നതിനു പിന്നിലെ പ്രാഥമിക ലക്ഷ്യവും ഇതാണ്. വളരെക്കാലമായി, രാജ്യത്തെ തൊഴില് ശക്തി ഡസന് കണക്കിന് തൊഴില് നിയമങ്ങളില് കുടുങ്ങിക്കിടക്കുന്നു. ഇവ ഇപ്പോള് നാല് കോഡുകളായി ഏകീകരിച്ചു, ഇത് തൊഴിലാളികള്ക്ക് ന്യായമായ വേതനവും അലവന്സുകളും മറ്റ് ക്ഷേമ ആനുകൂല്യങ്ങളും ലഭിക്കുന്നത് എളുപ്പമാക്കുന്നു.
ഹരിത വളര്ച്ചയുടെയും ആധുനിക സാങ്കേതികവിദ്യയുടെയും ശക്തികേന്ദ്രമാക്കി ഭാരതത്തെ മാറ്റുന്നതില് സര്ക്കാര് ശ്രദ്ധ കേന്ദ്രീകരിക്കുന്നു. അതിവേഗം വളരുന്ന ഡിജിറ്റല് സമ്പദ്വ്യവസ്ഥ, നിര്മിത ബുദ്ധി, ഡാറ്റാ സെന്ററുകള് എന്നിവയില് നിക്ഷേപങ്ങള് വര്ദ്ധിച്ചുകൊണ്ടിരിക്കുന്നു. ഈ പുതിയ രൂപത്തിലുള്ള സമ്പദ്വ്യവസ്ഥയ്ക്ക് കൂടുതല് ഊര്ജ്ജ ആവശ്യകതകളുമുണ്ട്. ഈ ദിശയില് ആണവോര്ജത്തിന് ഒരു പ്രധാന പങ്കുണ്ട്. അടുത്തിടെ നടപ്പിലാക്കിയ ശാന്തി നിയമം, 2047-ഓടെ 100 ജിഗാവാട്ട് ആണവോര്ജം എന്ന ലക്ഷ്യം കൈവരിക്കാന് സഹായിക്കും. ആണവോര്ജത്തിന് പുറമേ, ഭാരതം സൗരോര്ജ മേഖലയിലും അതിവേഗം മുന്നേറുന്നു. പ്രധാനമന്ത്രി സൂര്യ ഘര് മുഫ്ത് ബിജ്ലി യോജനയിലൂടെ, സാധാരണ ഉപഭോക്താക്കള് ഇപ്പോള് വൈദ്യുതി ഉത്പാദകരായി മാറുന്നു. ഇതുവരെ ഏകദേശം 20 ലക്ഷം പുരപ്പുറ സൗരോര്ജ സംവിധാനങ്ങള് സ്ഥാപിച്ചിട്ടുണ്ട്. ഇത് വൈദ്യുതി ഉത്പാദനം വര്ദ്ധിപ്പിക്കുന്നതിനും ലക്ഷക്കണക്കിന് വീടുകളുടെ വൈദ്യുതി ബില്ലുകള് കുറയ്ക്കുന്നതിനും കാരണമായി. ഈ ശ്രമങ്ങളെല്ലാം ഉപയോഗിച്ച്, ഈ ദശകത്തിന്റെ അവസാനത്തോടെ ഭാരതം 500 ജിഗാവാട്ട് പുനരുപയോഗ ഊര്ജ്ജ ശേഷി എന്ന ലക്ഷ്യം കൈവരിക്കും. വികസിത ഭാരതം എന്ന ദര്ശനം പൂര്ത്തീകരിക്കുന്നതിനായി, ഈ സര്ക്കാര് പരിഷ്കരണ എക്സ്പ്രസിന്റെ വേഗത ത്വരിതപ്പെടുത്തുന്നത് തുടരും.
വികസിത ഭാരതത്തിനായുള്ള ആദ്യ മുന്ഗണന സമൃദ്ധിയുള്ള കര്ഷകനാണ്. ഈ മനോഭാവത്തോടെയാണ് പ്രധാനമന്ത്രി കിസാന് സമ്മാന് നിധി പോലുള്ള പദ്ധതികള് സര്ക്കാര് ആരംഭിച്ചത്. ഈ പദ്ധതി പ്രകാരം ഇതുവരെ 4 ലക്ഷം കോടിയിലധികം രൂപ കര്ഷകരുടെ ബാങ്ക് അക്കൗണ്ടുകളിലേക്ക് നേരിട്ട് കൈമാറിയിട്ടുണ്ട്. സര്ക്കാരിന്റെ മികച്ച നയങ്ങളും ഇടപെടലുകളും രാജ്യത്തെ കാര്ഷിക ഉത്പാദനത്തില് ദ്രുതഗതിയിലുള്ള വര്ദ്ധനവിന് കാരണമായി. 2024-25 വര്ഷത്തില് ഭക്ഷ്യധാന്യങ്ങളുടേയും പൂന്തോട്ട വിളകളുടേയും റെക്കോര്ഡ് ഉത്പാദനമാണ് ഉണ്ടായത്. നമ്മുടെ കാര്ഷിക മേഖലയ്ക്ക് പിന്നാക്കം നില്ക്കേണ്ടി വന്ന ചില വിളകളുടെ ഉത്പാദനം വര്ദ്ധിപ്പിക്കുന്നതിനും സര്ക്കാര് പരിശ്രമിക്കുന്നു.
കാര്ഷിക ഉത്പന്നങ്ങളുടെ ഇറക്കുമതി കുറയ്ക്കുക എന്നതും സര്ക്കാരിന്റെ ലക്ഷ്യമാണ്. ഭക്ഷ്യ എണ്ണകള്, എണ്ണക്കുരുക്കള്, പയറുവര്ഗ്ഗങ്ങള് എന്നിവയ്ക്കായുള്ള ദേശീയ ദൗത്യങ്ങളിലൂടെ രാജ്യം ഈ മേഖലകളില് സ്വയംപര്യാപ്തതയിലേക്ക് നീങ്ങുകയാണ്. ഇതിന്റെ ഫലമായി 2024-25 വര്ഷത്തില് എണ്ണക്കുരു വിളകളുടെ ഉത്പാദനത്തിലും വര്ദ്ധനവുണ്ടായിട്ടുണ്ട്. കര്ഷകര്ക്ക് അധിക വരുമാനം ഉറപ്പാക്കുന്നതിനായി, മില്ലറ്റുകള് അഥവാ ശ്രീ-അന്ന ആഗോളതലത്തില് പ്രോത്സാഹിപ്പിക്കുന്നു. ഇന്ന്, ഭക്ഷ്യധാന്യ ഉത്പാദനത്തോടൊപ്പം കര്ഷകരെ സാമ്പത്തിക പുരോഗതിയുടെ പുതിയ വഴികളായ കന്നുകാലി വളര്ത്തല്, മത്സ്യബന്ധനം, തേനീച്ച വളര്ത്തല് എന്നിവയുമായും ബന്ധിപ്പിക്കുന്നു. തീരപ്രദേശങ്ങളില് താമസിക്കുന്ന മത്സ്യത്തൊഴിലാളികള്ക്ക് പ്രത്യേക സാമ്പത്തിക മേഖലയുടെ ആനുകൂല്യങ്ങള് ലഭ്യമാക്കുന്നതിനായി ഒരു പുതിയ നയം രൂപീകരിച്ചിട്ടുണ്ട്. കൂടാതെ, ഉള്ക്കടലിലെ വിഭവങ്ങള് പ്രയോജനപ്പെടുത്താന് അവരെ പ്രാപ്തരാക്കുന്നതിനായി മറ്റൊരു പുതിയ നയവും ആവിഷ്കരിച്ചിട്ടുണ്ട്. 2024-25 വര്ഷത്തില് രാജ്യത്തെ മത്സ്യ ഉത്പാദനം ഏകദേശം 200 ലക്ഷം ടണ്ണായി വര്ദ്ധിച്ചു. 2014-നെ അപേക്ഷിച്ച് 105 ശതമാനം വര്ദ്ധനവാണ് ഇത് പ്രതിഫലിപ്പിക്കുന്നത്.
(നാളെ: തൊഴില് ശക്തിയിലൂടെ പുരോഗതിയിലേക്ക്)
