കൊച്ചി: കടലില് കിടക്കുന്ന കണ്ടെയ്നറുകളില് കുടുങ്ങി മത്സ്യബന്ധന വലകള് കീറി നശിച്ചു. അത്യുന്നതന് എന്ന വള്ളത്തിലെ വലകളാണ് കീറിയത്. തോപ്പുംപടിയില് നിന്നും മത്സ്യബന്ധനത്തിന് പോയ യാനം 20 നോട്ടിക്കല് മൈല് അകലെ മത്സ്യബന്ധനം നടത്തവേയാണ് വള്ളത്തിന്റെ വലകള് കണ്ടയ്നറില് കുടുങ്ങി കീറിയതെന്ന് തൊഴിലാളികള് പറഞ്ഞു.
ചെല്ലാനം സ്വദേശികളായ പത്ത് പേര് ഒരുമിച്ച് ചേര്ന്ന് നടത്തുന്നതാണ് അത്യുന്നതന് എന്ന വളളം. വലകളില് ഉണ്ടായിരുന്ന മത്സ്യങ്ങളും പൂര്ണമായി നഷ്ടപ്പെട്ടു. ലക്ഷങ്ങളുടെ നഷ്ടം ഉണ്ടായതായി തൊഴിലാളികള് പറയുന്നു. ഏഴു മാസങ്ങള്ക്കു മുന്പ് കൊച്ചി തീരത്ത് അപകടത്തില്പ്പെട്ട എംഎസ്സി എല്സ എന്ന കപ്പലില് നിന്നും കടലില് പതിച്ച കണ്ടെയ്നറുകളുടെ അവശിഷ്ടങ്ങള് പൂര്ണമായും നീക്കാത്തത് മത്സ്യത്തൊഴിലാളികളെ ദുരിതത്തിലാക്കുകയാണ്.
ചെല്ലാനം തീരത്തുനിന്നും മത്സ്യബന്ധനത്തിനായി പോകുന്ന അമ്പതോളം തൊഴിലാളികള് ജോലി ചെയ്യുന്ന വലിയ വള്ളങ്ങള്ക്ക് കടലില് കിടക്കുന്ന കണ്ടെയ്നറുകള് വിനയായി മാറിയിട്ടുണ്ടെന്ന് മത്സ്യതൊഴിലാളികള് പറയുന്നു. പല മത്സ്യബന്ധയാനങ്ങള്ക്കും ഇത്തരത്തില് നാശനഷ്ടങ്ങള് ഉണ്ടാകുമ്പോഴും നഷ്ടപരിഹാരത്തിന് നടപടികള് ഉണ്ടാകുന്നില്ലെന്നാണ് തൊഴിലാളികള് ചൂണ്ടിക്കാട്ടുന്നത്.
