തിരുവനന്തപുരം: ശബരിമല സ്വര്ണക്കൊള്ളയുമായി ബന്ധപ്പെട്ട് എല്ലാ കാലത്തെയും അന്വേഷണത്തെയും സ്വാഗതം ചെയ്യുന്നുവെന്ന് ദേവസ്വം മന്ത്രി വി എന് വാസവന്. പ്രത്യേക സംഘത്തിന്റെ അന്വേഷണം തൃപ്തികരമാണ്. എന്നാല് ഇതിനിടയിലെ ഇഡി അന്വേഷണം സംശയകരമാണെന്നും ഇഡിയുടെ വിശ്വാസ്യത നഷ്ടപ്പെട്ടതാണെന്നും അദ്ദേഹം പറഞ്ഞു.
മുഖ്യമന്ത്രിക്കെതിരായ കേസ് അന്വേഷിച്ച ഉദ്യോഗസ്ഥന് കൈക്കൂലി കേസില് പുറത്തായെന്ന് മന്ത്രി ചൂണ്ടിക്കാട്ടി.ശബരിമല സ്വര്ണക്കൊള്ളക്കേസ് എസ്ഐടി ഭംഗിയായി അന്വേഷിക്കുന്നുണ്ടെന്നും മന്ത്രി പറഞ്ഞു.
ഇ ഡി അന്വേഷണത്തില് പല ഉദ്ദേശങ്ങളും കാണാം. ആരായാലും അന്വേഷണ പരിധിയില് വരട്ടെ. തന്ത്രിയിലേക്കോ മന്ത്രിയിലേക്കോ അന്വേഷണം പോകട്ടെ. അന്വേഷണത്തിന് വഴി പറഞ്ഞു കൊടുക്കേണ്ടതില്ല. എസ്ഐടിയാണ് അന്വേഷണം നടത്തുന്നത് .സര്ക്കാര് അല്ല- വി എന് വാസവന് പറഞ്ഞു.
അതിനിടെ,ശബരിമല സ്വര്ണക്കൊള്ളക്കേസിലെ കള്ളപ്പണ ഇടപാട് അന്വേഷിക്കുന്നതിനോടനുബന്ധിച്ച് ഇഡി മുഴുവന് പ്രതികളുടെയും വീടുകളില് ഇഡി റെയ്ഡ് നടത്തി. കേരളം, തമിഴ്നാട്, കര്ണാടക അടക്കമുള്ള മൂന്ന് സംസ്ഥാനങ്ങളിലായി 21 കേന്ദ്രങ്ങളിലാണ് ഇഡി പരിശോധന. കേസിലെ പ്രതികളായ ഉണ്ണികൃഷ്ണന് പോറ്റി, മുരാരി ബാബു, എ പത്മകുമാര്, എന് വാസു തുടങ്ങിയവരുടെ വീടുകളിലും സ്വര്ണ വ്യാപാരി ഗോവര്ധന്, സ്മാര്ട്ട് ക്രിയേഷന്സ് സിഇഒ പങ്കജ് ഭണ്ഡാരി തുടങ്ങിയവരുടെ സ്ഥാപനങ്ങളിലുമടക്കമാണ് പരിശോധന നടന്നത്. തിരുവനന്തപുരത്ത് ദേവസ്വം ബോര്ഡ് ആസ്ഥാനത്തും ഇഡി സംഘമെത്തി.ബെംഗളൂരുവിലെ ഗോവര്ധന്റെ ജ്വല്ലറിയിലും ഉണ്ണികൃഷ്ണന് പോറ്റിയുടെ ബെംഗളൂരു ശ്രീറാംപുരയിലെ വീട്ടിലും ഇഡി റെയ്ഡ് നടത്തി.
