തിരുവനന്തപുരം: സംസ്ഥാന ഭാഗ്യക്കുറി ക്ഷേമനിധി ബോര്ഡിൽ ഗുരുതര ക്രമക്കേട് നടന്നതായി കണ്ടെത്തിയത്തിന് പിന്നാലെ എൽഡി ക്ലർക്ക് സംഗീത് അറസ്റ്റിൽ. ലോട്ടറി ഏജന്റുമാരുടെ ക്ഷേമനിധി തുകയിൽ നിന്ന് 14.93 കോടി രൂപ തട്ടിയ സംഭവത്തിലാണ് ക്ലർക്ക് പിടിയിലായിട്ടുള്ളത്. സ്പെഷ്യൽ ഓഡിറ്റ് റിപ്പോര്ട്ടിലാണ് ക്രമക്കേട് കണ്ടെത്തിയതും വിവരം പുറംലോകമറിയുന്നതും.
എൽഡി ക്ലർക്കായിരുന്ന സംഗീത് ലോട്ടറി ഏജന്റുമാരുടെ ക്ഷേമനിധി തുക ബോര്ഡിന്റെ ബാങ്ക് അക്കൗണ്ടിൽ അടയ്ക്കാതെ തൻേറയും ബന്ധുവിന്റെയും അക്കൗണ്ടിലേക്ക് മാറ്റുകയായിരുന്നു. വാർഷിക ഓഡിറ്റിൽ പിടിക്കപ്പെടാതിരിക്കാനായി വ്യാജ രേഖകള് ഉണ്ടാക്കിയതായും കണ്ടെത്തി. ക്രമക്കേട് കണ്ടെത്തിയതോടെ ഇയാളെ ജോലിയിൽ നിന്നും സസ്പെന്റ് ചെയ്തിരുന്നു. കേസന്വേഷിക്കുന്ന വിജിലൻസ് സ്പെഷ്യൽ ഇൻവെസ്റ്റിഗേഷൻ യൂണിറ്റ് രണ്ടിലെ ഇൻസ്പെക്ടർ അനൂപ് ചന്ദ്രനാണ് സംഗീതിനെ ഇന്ന് അറസ്റ്റ് ചെയ്തത്.
ഏഴുവര്ഷത്തിനിടെ നടന്ന തട്ടിപ്പിന്റെ ഞെട്ടിക്കുന്ന വിവരങ്ങൾ ഉൾപ്പെട്ട സ്പെഷ്യൽ ഓഡിറ്റ് റിപ്പോര്ട്ടി കഴിഞ്ഞ ദിവസം പുറത്തുവന്നിരുന്നു. 2013 മുതൽ 2020വരെയുള്ള കാലയളവിൽ തട്ടിപ്പ് നടന്നുവെന്നാണ് കണ്ടെത്തിയിട്ടുള്ളത്. തട്ടിപ്പ് സംബന്ധിച്ച് നേരത്തെ ആരോപണങ്ങൾ ഉയർന്ന സാഹചര്യത്തിൽ ആരോപണവിധേയനായ സംഗീതിനെ ജോലിയും നിന്നും സസ്പെന്റ് ചെയ്തിരുന്നു. കേരള സംസ്ഥാന ഭാഗ്യക്കുറി ഏജന്റുമാരുടെയും വിൽപ്പനക്കാരുടെയും ക്ഷേമനിധി ബോര്ഡിലാണ് ഇത്രയധികം തുകയുടെ വൻ തട്ടിപ്പ് നടന്നത്.
ലോട്ടറി വിറ്റ് ഉപജീവനം നടത്തുന്ന ലോട്ടറി ഏജന്റുമാര് പ്രതിമാസം നിശ്ചിത തുക ക്ഷേമനിധി ബോര്ഡിലേക്ക് അടക്കുന്നുണ്ട്. ഈ തുകയെ ആശ്രയിച്ച് കഴിയുന്ന നൂറുകണക്കിന് ലോട്ടറി ഏജന്റുമാരുടെയും തൊഴിലാളികളുടെയും ക്ഷേമനിധി തുകയാണ് ഇത്തരത്തിൽ തട്ടിയെടുത്തത്. തട്ടിയ തുക ബന്ധുക്കളുടെയും സുഹൃത്തുക്കളുടെയും അക്കൗണ്ടുകളിലേക്ക് പല തവണകളായി മാറ്റുകയായിരുന്നു. വൻക്രമക്കേടാണ് നടന്നതെന്നാണ് കണ്ടെത്തൽ. ബോർഡിനുണ്ടായ ഗുരുതര വീഴ്ചയാണ് പണം നഷ്ടമാകാൻ കാരണമെന്ന് സ്പെഷ്യൽ ഓഡിറ്റിൽ പറയുന്നത്. ഓഡിറ്റുകള് നടന്നപ്പോള് വ്യാജ ബാങ്ക് സ്റ്റേറ്റ്മെൻറുകളാണ് സംഗീത് സമർപ്പിച്ചത്.
ലോട്ടറി ഡയറക്ടറാണ് ബോർഡിന്റെ സിഇഒയായി പ്രവർത്തിക്കേണ്ടത്. എന്നാൽ, ഉത്തരവാദിത്വപ്പെട്ട ഉദ്യോഗസഥരാരും അംശാദായം ബാങ്കിലേക്ക് അടയ്ക്കുന്ന കാര്യങ്ങളോ സർക്കാർ ഗ്രാൻ്റ് കൈകാര്യം ചെയ്യുന്ന കാര്യമോ മേൽനോട്ടം വഹിച്ചില്ല. ക്ലർക്കായ സംഗീതാണ് മുഴുവൻ പണവും കൈകാര്യം ചെയ്ത്. ബാങ്കുകളിൽ നിന്നും ജില്ലാ ഓഫീസുകളിൽ നിന്നും വന്ന പണം പല ഘട്ടങ്ങളിലായി സംഗീത് സ്വന്തം അക്കൗണ്ടിലേക്കും സുഹൃത്തായ അനിൽകുമാറിന്റെ അക്കൗണ്ടിലേക്കും മാറ്റികൊണ്ടിരുന്നു.
ഇത്രയും വലിയ തട്ടിപ്പ് നടന്നിട്ടും ബോർഡ് ഇതൊന്നും കണ്ടില്ല എന്നത് വലിയ വീഴ്ചയാണ്. ഒരു ക്ലർക്ക് നടത്തിയ ഈ തിരിമറി ബോർഡോ സിഇഒയോ അറിഞ്ഞില്ലെന്നാണ് ഓഡിറ്റ് റിപ്പോർട്ടിൽ പറയുന്നത്. ക്ലർക്കായ സംഗീത് നിലവില് സസ്പെൻഷനിലാണ്. ഒരു പൊതുമേഖല ബാങ്കിൽ ബോർഡിനുണ്ടായിരുന്ന അക്കൗണ്ടുകള് നിർത്തലാക്കാനും പുതിയ ബാങ്കിൽ അക്കൗണ്ട് തുടങ്ങാനും തീരുമാനിച്ചിരുന്നു. ഉപേക്ഷിച്ച അക്കൗണ്ടിൽ നിന്നും പുതിയ അക്കൗണ്ടിലേക്ക് പണം മാറ്റാനുള്ള ചുമതലയുണ്ടായിരുന്ന ക്ലർക്ക് സംഗീത് ആ പണവും തട്ടിയെടുത്തിട്ടും ബോർഡ് അറിഞ്ഞില്ല.
വർഷത്തിൽ നാല് പ്രാവശ്യം ബോർഡ് ചേർന്ന് സാമ്പത്തിക സ്ഥിതി ഉള്പ്പെടെ വിലയിരുത്തണമെന്നാണ് ചട്ടം. എന്നാൽ, അത് പാലിക്കപ്പെട്ടില്ല. ഉന്നത ഉദ്യോഗസ്ഥരുടെ പേരിലും ക്യാഷ് ചെക്കുകള് വ്യാജ ഒപ്പും സീലും പതിച്ച് സംഗീത് മാറിയെടുത്തു. എത്രയും വലിയൊരു തട്ടിപ്പ് സംഗീത ഒറ്റയ്ക്ക് നടത്തിയോ എന്നത് ഇപ്പോഴും സംശയമായി നിൽക്കുകയാണ്. സംഭവത്തിൽ വിജിലൻസ് അന്വേഷണവും നടക്കുന്നുണ്ട്.
