ന്യൂദല്ഹി: യുഎപിഎ കേസില് കശ്മീരി വിഘടനവാദി നേതാവും ദുക്തരണ്- ഇ- മില്ലത്തിന്റെ മേധാവിയുമായ ആസിയ അന്ദ്രാബി കുറ്റക്കാരിയെന്ന് ദല്ഹി കോടതി. ഭീകരരുമായി ഇവര് ബന്ധം പുലര്ത്തിയിരുന്നെന്നും രാജ്യ വിരുദ്ധ പ്രവര്ത്തനങ്ങളില് ഏര്പ്പെട്ടെന്നും കണ്ടെത്തിയതിനെ തുടര്ന്നാണിത്. ശിക്ഷ ശനിയാഴ്ച പ്രഖ്യാപിക്കും.
ഭീകര സംഘടനയിലേക്ക് ആളുകളെ ചേര്ക്കല്, ഭാരത വിരുദ്ധ പ്രസംഗം, ക്രിമിനല് ഗൂഢാലോചന, നിയമ വിരുദ്ധ പ്രവര്ത്തനങ്ങളില് ഏര്പ്പെടല് തുടങ്ങിയ കുറ്റങ്ങളാണ് എന്ഐഎ അന്ദ്രാബിക്കെതിരെ ചുമത്തിയത്. യുഎപിഎ സെക്ഷന് 18, 38 എന്നീ വകുപ്പുകള് പ്രകാരമാണ് ഇവര് കുറ്റക്കാരെന്ന് കോടതി വിധിച്ചത്. ഇവരുടെ രണ്ട് അനുയായികള് കൂടി കേസില് പ്രതികളാണ്.
1987 ലാണ് അന്ദ്രാബി വനിതകളുടെ വിഘടന വാദി ഗ്രൂപ്പായ ദുക്തരണ് ഇ മില്ലത്ത്(ഡിഇഎം) സ്ഥാപിക്കുന്നത്. ജമ്മുകശ്മീരിലെ രാജ്യവിരുദ്ധ നടപടികള്ക്കെതിരെ കേന്ദ്രം നടപടി ശക്തമാക്കിയതോടെ 2018 ഏപ്രിലില് അന്ദ്രാബി അറസ്റ്റിലായി. തുടര്ന്ന് ഡിഇഎമ്മിന് രാജ്യത്ത് നിരോധനം ഏര്പ്പെടുത്തി, ഇവരുടെ സ്വത്തുകളും കണ്ടുകെട്ടി.
