ദേവദുന്ദുഭിയില് ശ്രുതി ചേര്ത്ത്, ജയദേവരുടെ ഗീതഗോവിന്ദത്തിലെ അഷ്ടപദി കലോത്സവ വേദിക്ക് ശുദ്ധസംഗീതത്തിന്റെ രാഗരസം സമ്മാനിച്ചു. സംസ്കൃതോത്സവത്തില് ഹൈസ്കൂള് ആണ്കുട്ടികളുടെ അഷ്ടപദി ഉന്നത നിലവാരം പുലര്ത്തിയപ്പോള് മത്സരം ആവേശമായി.
അഷ്ടപദിയില് പങ്കെടുത്ത 14 പേര്ക്കും എ ഗ്രേഡ് ലഭിച്ചു. ജയദേവകവിയുടെ ഗീതഗോവിന്ദത്തിലെ 24 അഷ്ടപദികളാണ് സാധാരണയായി വേദികളില് അവതരിപ്പിക്കുന്നത്. ഓരോ പദങ്ങളും ഓരോ രാഗങ്ങളിലാണ് ആലപിക്കുന്നതെന്ന് ഈയിനത്തില് എ ഗ്രേഡ് ലഭിച്ച കോട്ടയം കുറിച്ചിത്താനം ശ്രീകൃഷ്ണ വൊക്കേഷണല് ഹയര് സെക്കന്ഡറി സ്കൂളിലെ പത്താം ക്ലാസ് വിദ്യാര്ഥി ശ്രേയസ് ആര്. നായര് പറഞ്ഞു. കോട്ടയം ജില്ലയിലെ കടുത്ത മത്സരത്തിനൊടുവില് എ ഗ്രേഡ് നേടിയാണ് സംസ്ഥാനതല മത്സരത്തിന് ശ്രേയസ് അര്ഹനായത്. പ്രശസ്ത സോപാന സംഗീതജ്ഞന് ഏലൂര് ബിജുവിന്റെ ശിഷ്യനാണ് ശ്രേയസ്. ഈയിടെ അന്തരിച്ച തൃക്കാരിയൂര് സുരേഷ് മാരാരാണ് ഇടയ്ക്കയില് ശ്രേയസിന്റെ ഗുരു.
ജന്മഭൂമി കോട്ടയം എഡിഷനില് ന്യൂസ് എഡിറ്ററായ സി.കെ. രാജേഷ് കുമാറിന്റെയും കെ.ആര് നാരായണന് ഫിലിം ഇന്സ്റ്റിറ്റ്യൂട്ട് ഡയറക്ടര് ഇന് ചാര്ജ് പി.എസ്. ലക്ഷ്മിപ്രിയയുടെയും മകനാണ് ശ്രേയസ്. നാലാം ക്ലാസില് പഠിക്കുന്ന നവ്ദീപ് സഹോദരന്.
