ഒന്ന് മയത്തിൽ തള്ളന്റെ ഷഹബാസേ ! ഇന്ത്യയ്‌ക്കെതിരായ വിജയത്തിനുശേഷം എല്ലാവരും പാകിസ്ഥാൻ യുദ്ധവിമാനങ്ങൾ ആവശ്യപ്പെടുന്നുവെന്ന് പാക് പ്രധാനമന്ത്രി

ഇസ്ലാമാബാദ്: 1971 ലെ യുദ്ധത്തിൽ പകുതി രാജ്യത്തിന്റെയും നഷ്ടം നേരിട്ടിട്ടും വിജയിച്ചു എന്ന് അവകാശപ്പെടുന്ന പാകിസ്ഥാന് പൊള്ളയായ അവകാശവാദങ്ങൾ ഉന്നയിക്കാൻ യാതൊരു മടിയുമില്ല എന്നത് വാസ്തവമാണ്. ഈ സാഹചര്യത്തിൽ ഓപ്പറേഷൻ സിന്ദൂരിനിടെ ഒമ്പത് ഭീകര കേന്ദ്രങ്ങൾ നശിപ്പിച്ചതിനും, 11 വ്യോമതാവളങ്ങളിൽ ഇന്ത്യയുടെ ബ്രഹ്മോസ് ആക്രമണത്തിനും, കുറഞ്ഞത് ആറ് മുതൽ ഏഴ് വരെ യുദ്ധവിമാനങ്ങൾ നഷ്ടപ്പെട്ടതിനും ശേഷവും അവർ യുദ്ധത്തിൽ ജയിച്ചുവെന്ന് പറയുന്നതിൽ സംശയമില്ല.

ഇപ്പോഴിത ഇന്ത്യയുടെ ഓപ്പറേഷൻ സിന്ദൂരിൽ നിന്ന് സ്വയം സംരക്ഷിക്കാൻ 100-ലധികം തവണ യുഎസിനോട് അപേക്ഷിച്ചതായി യുഎസ് സർക്കാർ ഫയലുകൾ വെളിപ്പെടുത്തിയിട്ടും പതിവുപോലെ ഈ ഇസ്ലാമിക രാജ്യം കള്ളം പറയുകയാണ്. കഴിഞ്ഞ വർഷത്തെ സൈനിക വിജയങ്ങളെത്തുടർന്ന് പാകിസ്ഥാന്റെ പ്രതിരോധ ഉത്പാദനം ശക്തിപ്പെട്ടിട്ടുണ്ടെന്നാണ് പാകിസ്ഥാൻ പ്രധാനമന്ത്രി ഷഹബാസ് ഷെരീഫ് ഇപ്പോൾ പ്രസ്താവിച്ചിരിക്കുന്നത്. കൂടാതെ പാകിസ്ഥാൻ ജെഎഫ്-17 യുദ്ധവിമാനങ്ങൾ പല രാജ്യങ്ങൾക്കും വിറ്റതായും പ്രധാനമന്ത്രി അവകാശപ്പെടുന്നു.

അതേ സമയം പാകിസ്ഥാൻ സംരക്ഷണം ആവശ്യപ്പെട്ട് 100-ലധികം തവണ അപേക്ഷിച്ചതായി യുഎസ് ഫയലുകൾ വെളിപ്പെടുത്തിയതിനെത്തുടർന്ന് നാണക്കേട് ഒഴിവാക്കാൻ പാകിസ്ഥാൻ നേതാക്കൾ യുദ്ധവിമാന വിൽപ്പനയെക്കുറിച്ച് വ്യാജ വാർത്തകൾ പ്രചരിപ്പിക്കുകയാണെന്ന് വിദഗ്‌ദ്ധർ കരുതുന്നു. പാകിസ്ഥാന്റെ യുദ്ധവിമാനങ്ങൾക്കുള്ള ആഗോള ആവശ്യം വർദ്ധിച്ചുവെന്നും പല രാജ്യങ്ങളും വലിയ താൽപ്പര്യത്തോടെ പാകിസ്ഥാനുമായി ഇടപഴകുന്നുണ്ടെന്നും ഷഹബാസ് ഷെരീഫ് പ്രസ്താവിക്കുകയാണ്.

കൂടുതൽ വികസനം പ്രതിരോധ ശേഷികളെ ശക്തിപ്പെടുത്തുകയും ദേശീയ സമ്പദ്‌വ്യവസ്ഥയെ ഉത്തേജിപ്പിക്കുകയും ചെയ്യുമെന്നുമാണ് ഷെരീഫ് പറയുന്നത്.
ബുധനാഴ്ച നടന്ന ഫെഡറൽ കാബിനറ്റ് യോഗത്തിൽ അധ്യക്ഷത വഹിച്ച് സംസാരിക്കവെ പാകിസ്ഥാൻ വ്യോമസേന തൈമൂർ സംവിധാനം വിജയകരമായി വിക്ഷേപിച്ചുവെന്ന് അദ്ദേഹം പറഞ്ഞു. കൂടാതെ പാകിസ്ഥാൻ നാവികസേന LY-80 സംവിധാനം വിജയകരമായി പരീക്ഷിച്ചുവെന്നും ഷഹബാസ് ഷെരീഫ് വീമ്പിളക്കി. തുടർന്ന് ഈ നേട്ടങ്ങളിൽ ഉൾപ്പെട്ട എല്ലാ ഉദ്യോഗസ്ഥരെയും അദ്ദേഹം അഭിനന്ദിച്ചു.

ഇതിൽ എടുത്ത് പറയേണ്ടത് കഴിഞ്ഞ വർഷം മെയ് മാസത്തിൽ ഇന്ത്യയ്‌ക്കെതിരെ ഷഹബാസ് ഷെരീഫ് വിജയം അവകാശപ്പെട്ടുവെന്നതാണ്. സൈനിക വിജയങ്ങൾക്ക് ശേഷം പാകിസ്ഥാൻ ശ്രദ്ധേയമായ പുരോഗതി കൈവരിച്ചു എന്ന് അദ്ദേഹം പറഞ്ഞു. കഴിഞ്ഞ വർഷം നമ്മുടെ സൈന്യം വിജയം നേടിയതിനുശേഷം, നമ്മുടെ യുദ്ധവിമാനങ്ങൾക്കുള്ള ആഗോള ആവശ്യം ഗണ്യമായി വർദ്ധിച്ചു. പല രാജ്യങ്ങളും ഈ രംഗത്ത് പാകിസ്ഥാനുമായി സജീവമായി ചർച്ചകൾ നടത്തുന്നുണ്ട്, ഇത് നമ്മുടെ പ്രതിരോധ ഉൽപ്പാദനം ശക്തിപ്പെടുത്തുകയും ദേശീയ സമ്പദ്‌വ്യവസ്ഥയ്‌ക്ക് ഗണ്യമായ ഉത്തേജനം നൽകുകയും ചെയ്യുമെന്നും ഷെരീഫ് പറഞ്ഞു.

അതേ സമയം സൗദി അറേബ്യ, ഇന്തോനേഷ്യ, ബംഗ്ലാദേശ്, സുഡാൻ, ലിബിയ തുടങ്ങിയ രാജ്യങ്ങൾക്ക് ജെഎഫ്-17 യുദ്ധവിമാനങ്ങൾ വിൽക്കുന്നതായി പാകിസ്ഥാൻ അവകാശപ്പെട്ടിട്ടുണ്ട്. എന്നിരുന്നാലും ലിബിയ ഒഴികെയുള്ള ഒരു രാജ്യവും പാകിസ്ഥാന്റെ അവകാശവാദങ്ങൾ സ്ഥിരീകരിച്ചിട്ടില്ല. ഒരു അന്താരാഷ്‌ട്ര വാർത്താ ഏജൻസിയുടെ പാകിസ്ഥാൻ പത്രപ്രവർത്തകൻ പാകിസ്ഥാനിലെ അജ്ഞാത സുരക്ഷാ സ്രോതസ്സുകളെ ഉദ്ധരിച്ച് എല്ലാ ദിവസവും ജെഎഫ്-17 നെക്കുറിച്ച് റിപ്പോർട്ടുകൾ പ്രസിദ്ധീകരിക്കുന്നുണ്ട്.

എന്നിരുന്നാലും സോഷ്യൽ മീഡിയ പ്ലാറ്റ്‌ഫോമുകളിലെ ആളുകൾ ഇത് തുറന്നുകാട്ടുകയും അന്താരാഷ്‌ട്ര വാർത്താ ഏജൻസിയെ ലക്ഷ്യം വയ്‌ക്കാൻ തുടങ്ങുകയും ചെയ്തതോടെ പുതിയ അവകാശവാദങ്ങൾ നിലച്ചു. ചൈനീസ് യുദ്ധവിമാനങ്ങളുടെ വിൽപ്പന വർദ്ധിപ്പിക്കാനുള്ള ചൈനയുടെ നിർദ്ദേശപ്രകാരമാണ് ഈ കാമ്പെയ്‌ൻ നടത്തുന്നതെന്ന് ചില ജിയോപൊളിറ്റിക്കൽ വിദഗ്ധർ അവകാശപ്പെടുന്നു. ജെഎഫ്-17 യുദ്ധവിമാനത്തിൽ ചൈനയ്‌ക്ക് 65 ശതമാനം വിഹിതമുണ്ട്, അതേസമയം പാകിസ്ഥാന് 35 ശതമാനം മാത്രമാണ് വിഹിതം.