കാസര്കോട്: ആദര്ശശാലികളായ തലമുറകളെ സൃഷ്ടിച്ച് ലോകത്തിന് നേതൃത്വം നല്കുവാന് പാകത്തിലുള്ളവരെ വളര്ത്തിക്കൊണ്ടുവരുന്ന അദ്വിതീയമായ പ്രവര്ത്തനമാണ് ബാലഗോകുലം നടത്തിവരുന്നതെന്ന് ഹിന്ദു ഐക്യവേദി സംസ്ഥാന വര്ക്കിംഗ് പ്രസിഡന്റ് വത്സന് തില്ലങ്കേരി അഭിപ്രായപ്പെട്ടു.
ബാലഗോകുലം സംസ്ഥാന തലത്തില് നടത്തിയ സുകൃതം കേരളം കലായാത്രയുടെ സമാപന സമ്മേളനത്തില് കാസര്കോട് മധൂരില് മുഖ്യപ്രഭാഷണം നടത്തുകയായിരുന്നു അദ്ദേഹം. മൂല്യാധിഷ്ഠിത വിദ്യാഭ്യാസത്തിലൂടെ കുട്ടികളെ വളര്ത്തി സമൂഹത്തില് നിലനില്ക്കുന്ന ലഹരി പോലുള്ള മാരക വിപത്തിനെ നിര്മാര്ജനം ചെയ്യാന് കലായാത്രയുടെ പരിശ്രമം അഭിനന്ദനാര്ഹമാണ്. പരമവൈഭവത്തിലേക്കുള്ള പാതയില് ഭാരതത്തിന് ആദര്ശ ബാല്യങ്ങളെ സൃഷ്ടിക്കുന്നതില് ഗോകുലങ്ങള്ക്ക് വലിയ പങ്ക് നിര്വഹിക്കാനുണ്ടെന്നും തില്ലങ്കേരി കൂട്ടിച്ചേര്ത്തു. സമാപന സമ്മേളനം പ്രശസ്ത സംഗീതജ്ഞനും ക്ഷേത്ര കലാ അക്കാദമി ചെയര്മാനുമായ ഡോ. കാഞ്ഞങ്ങാട് രാമചന്ദ്രന് ഉദ്ഘാടനം ചെയ്തു.
സ്വാഗതസംഘം അധ്യക്ഷന് കെ. ഗോപാലകൃഷ്ണ ഭട്ട്കല് അധ്യക്ഷത വഹിച്ചു. സംസ്ഥാന ഉപാധ്യക്ഷന് കെ.പി. ബാബുരാജന് മാസ്റ്റര് കലായാത്രാ സന്ദേശം നല്കി.
കജംബാഡി സുബ്രഹ്മണ്യ ഭട്ട്, മധൂര് ഗ്രാമപഞ്ചായത്ത് പ്രസിഡന്റ് സുജ്ഞാനി ശ്യാന്ബോഗ്, ബാലഗോകുലം സംസ്ഥാന അധ്യക്ഷന് ആര്. പ്രസന്നകുമാര്, ജനറല് സെക്രട്ടറി കെ.എന്. സജികുമാര്, ദക്ഷിണകേരളം അധ്യക്ഷന് ഡോ. ഉണ്ണികൃഷ്ണന്, ഉത്തര കേരളം അധ്യക്ഷന് എം. സത്യന്, മധൂര് ക്ഷേത്രം എക്സി. ഓഫീസര് ജഗദീഷ് പ്രസാദ്, അരവിന്ദ എന്നിവര് സംസാരിച്ചു. കലായാത്ര സംയോജക് പി. പ്രശോഭ് മാസ്റ്റര് സ്വാഗതവും സ്വാഗതസംഘം കണ്വീനര് ധനഞ്ജയന് മധൂര് നന്ദിയും പറഞ്ഞു. തുടര്ന്ന് കലായാത്ര ടീം അവതരിപ്പിച്ച നൃത്ത സംഗീത ശില്പവും ഗോകുലാംഗങ്ങളുടെ കലാപരിപാടികളും അരങ്ങേറി.
