തിരുവനന്തപുരം: ഗവ. ലോ കോളജ് കാമ്പസില് എസ്എഫ്ഐ നിര്മിക്കുന്ന രക്തസാക്ഷിമണ്ഡപത്തെച്ചൊല്ലി തര്ക്കം. കോളജിന്റെ അനുമതിയില്ലാതെ എസ്എഫ്ഐ അനധികൃത നിര്മാണം നടത്തിയെന്ന് ആരോപിച്ച് കോളജ് അധികൃതരും രംഗത്തെത്തി.
പിഎഫ്ഐക്കാര്, കാമ്പസില് കയറി വെട്ടിക്കൊന്ന എസ്എഫ്ഐയിലെ സക്കീറിന്റെ രക്തസാക്ഷിമണ്ഡപമാണ് കോളജ് കാമ്പസിനുള്ളില് നിര്മിച്ചത്. കോളജ് കാമ്പസിനകത്ത് ഒരിടത്തും ഇതുവരെ രക്തസാക്ഷിമണ്ഡപം നിര്മിക്കാന് അനുവാദം നല്കിയിട്ടില്ല. അപ്പോഴാണ് കോളജ് അധികൃതരുടെ അനുമതി ഇല്ലാതെ കാമ്പസിനുള്ളില് രക്തസാക്ഷിമണ്ഡപം നിര്മിക്കാന് എസ്എഫ്ഐ ശ്രമിച്ചത്.
എസ്എഫ്ഐ കോളജ് യൂണിയന് ഭാരവാഹികളടക്കം നിര്മാണ സാമഗ്രികളുമായി കോളജ് കാമ്പസിനുള്ളില് എത്തിയതാണ് വിവാദമായത്. ഞായറാഴ്ച ഉച്ചയോടെയാണ് യൂണിയന് ഭാരവാഹികളടക്കമുള്ള നേതാക്കള് കാമ്പസിനുള്ളില് എത്തിയത്. ഇതിനെതിരെ പ്രതിപക്ഷ വിദ്യാര്ത്ഥി സംഘടനകള് പ്രതിഷേധിച്ചിരുന്നു. കോളജ് അധികൃതര് നിര്മാണം തടഞ്ഞെങ്കിലും എസ്എഫ്ഐ നിര്മാണവുമായി മുന്നോട്ടുപോവുകയായിരുന്നു. ഇതേത്തുടര്ന്ന് പ്രിന്സിപ്പല് മ്യൂസിയം പോലീസിനെ വിവരമറിയിച്ചു.
അതേസമയം, കോളജില് അത്തരത്തിലൊരു നിര്മാണം നടത്തിയിട്ടില്ലെന്ന് എസ്എഫ്ഐ യൂണിയന് വ്യക്തമാക്കി. സംഭവവുമായി ബന്ധപ്പെട്ട് മ്യൂസിയം പോലീസില് പ്രിന്സിപ്പല് പരാതി നല്കി. വര്ഷങ്ങള്ക്കുമുമ്പ് കോളജില് താത്കാലിക ഷെഡ്ഡ് നിര്മിച്ചതും വിവാദമായിരുന്നു.
