കൊച്ചി: മറന്നുപോയ ഭാരതീയ വിജ്ഞാന സമ്പ്രദായത്തെ ഓര്മിപ്പിക്കാനും ബോധപൂര്വമുള്ള പുനര് വായനയ്ക്കുമാണ് ധരംപാലിന്റെ മനോഹരവൃക്ഷം ശ്രമിച്ചത് എന്ന് ഡോ. എം.വി. നടേശന് അഭിപ്രായപ്പെട്ടു. ഭാരതീയതയെ മറന്ന വിദ്യാഭ്യാസ പദ്ധതിയിലൂടെ പഠിച്ചിറങ്ങുന്നവര്ക്ക് സമൂഹത്തിന് വേണ്ടി ഒന്നും സംഭാവന ചെയ്യാന് സാധിക്കുന്നില്ലെന്ന് അദ്ദേഹം ചൂണ്ടിക്കാട്ടി. വിശ്വസംവാദ കേന്ദ്രം സംഘടിപ്പിച്ച പുസ്തക ചര്ച്ചയില് സംസാരിക്കുകയായിരുന്നു അദ്ദേഹം.
പ്രശസ്ത ഗാന്ധിയന് ധരംപാലിന്റെ മനോഹരവൃക്ഷം എന്ന പുസ്തകമാണ് ചര്ച്ചയായത്. ബ്രിട്ടീഷ് ഭരണകാലത്ത് ഭാരതത്തില് എല്ലാ മേഖലയിലും കോളനിവല്ക്കരണം ബാധിച്ചിരുന്നതായി പരിപാടിയില് അധ്യക്ഷത വഹിച്ച സാഹിത്യകാരന് എം.വി. ബെന്നി പറഞ്ഞു. മതരംഗത്ത് പോലും മേല്ക്കോയ്മാ മനോഭാവം സൃഷ്ടിക്കപ്പെട്ടു. ഭാരതീയ മതങ്ങളെ പാഗണ് മതങ്ങളായാണ് വിലയിരുത്തിയത്. സാഹിത്യ സാംസ്കാരിക മേഖലയിലും ഇത് ബാധിച്ചിരുന്നു. മഹാകാവ്യങ്ങള്, ആട്ടകഥകള് തുടങ്ങിയ ഭാരതീയ സമീപനങ്ങള് പൂര്ണമായും രണ്ടാം കിടയായി കണ്ടു. ബ്രിട്ടീഷ് സമീപനങ്ങള്ക്ക് മുന്തൂക്കം ഉണ്ടായി. അവ ഇന്നും തുടരുന്നുണ്ട്. മലയാള നോവല് സാഹിത്യത്തില് ‘ഇന്ദുലേഖ’ കൊളോണിയല് മനോഭാവം പേറുന്ന കൃതിയാണ്. സി.വി. രാമന്പിള്ളയുടെ കൃതികള് ഭാരതീയ സമീപനമാണ്. എന്നാല് കൊളോണിയല് മനോഭാവക്കാര്ക്ക് പ്രിയം ‘ഇന്ദുലേഖ’ ആണ്. സ്വത്വം വിണ്ടെടുക്കാന് ഇത്തരം സമീപനങ്ങള് മാറണമെന്ന് അദ്ദേഹം ചൂണ്ടിക്കാട്ടി. ലക്ഷ്മീ ബായ് ധര്മപ്രകാശന് ട്രസ്റ്റ് ചെയര്മാന് എം. മോഹനന് ധരംപാല് സാഹിത്യ പരിചയം നടത്തി. സഹകാര് ഭാരതി ഹാളില് നടന്ന പരിപാടിയില് പുസ്തകചര്ച്ച കണ്വീനര് ആര്. രാജീവ് സ്വാഗതവും അഡ്വ. ജയന്ത് നന്ദിയും പറഞ്ഞു. ദേശീയ വിദ്യാഭ്യാസ നയത്തെക്കുറിച്ചും പരിപാടിയില് ചര്ച്ച നടന്നു.
