പ്രഷർ കുക്കർ പഴകുന്തോറും അത് ആരോഗ്യത്തിന് വന് ഭീഷണിയാകുമെന്നാണ് പുതിയ പഠനങ്ങൾ മുന്നറിയിപ്പ് നൽകുന്നത്. പഴയ പ്രഷർ കുക്കറുകൾ ഉപയോഗിക്കുമ്പോൾ അവയിൽ നിന്ന് ലെഡ് അഥവാ ഈയം ആഹാരത്തിലേക്ക് കലരാൻ സാധ്യതയുണ്ട്. ഈ ഈയം ഒരിക്കൽ ശരീരത്തിലെത്തിയാൽ അത് പെട്ടെന്നൊന്നും പുറത്തുപോകില്ല. പകരം എല്ലുകളിലും രക്തത്തിലും തലച്ചോറിലും അടിഞ്ഞുകൂടും.
മുതിർന്നവരേക്കാൾ വേഗത്തിൽ കുഞ്ഞുങ്ങളുടെ ആരോഗ്യത്തെ ഇത് ബാധിക്കും. തലച്ചോറിന്റെ വളർച്ച മന്ദഗതിയിലാകാനും, ബുദ്ധിശക്തി കുറയാനും, പഠനവൈകല്യങ്ങൾക്കും ഇത് കാരണമായേക്കാം.സാധാരണഗതിയിൽ ഒരു പ്രഷർ കുക്കറിന്റെ ആയുസ്സ് 10 വർഷമാണ്. അതിൽ കൂടുതൽ കാലം അത് ഉപയോഗിക്കുന്നത് സുരക്ഷിതമല്ല.
കുക്കറിന്റെ അടിഭാഗം വീർക്കുകയോ, മൂടി കൃത്യമായി ഇരിക്കാതിരിക്കുകയോ ചെയ്താൽ അത് അപകടകരമാണ്. ഇത് പ്രഷർ ലീക്ക് ചെയ്യാനും പൊട്ടിത്തെറിക്കാനും കാരണമായേക്കാം. അതേപോലെ, വിസിൽ കൃത്യമായി വരാതിരിക്കുക, ഹാൻഡിൽ ഇളകി നിൽക്കുക, ഗാസ്കറ്റ് ഇടയ്ക്കിടെ കേടുവരുക തുടങ്ങിയവ കുക്കർ പഴകിയതിന്റെ ലക്ഷണങ്ങളാണ്. പാകം ചെയ്യുന്ന ഭക്ഷണത്തിന് ചെറിയ ലോഹരുചിയോ നിറവ്യത്യാസമോ അനുഭവപ്പെടുന്നുണ്ടെങ്കിൽ കുക്കർ ഉടൻ മാറ്റണം
