കോട്ടയം: അദ്ധ്യാപക നിയമന യോഗ്യതയായ കെ-ടെറ്റുമായി ബന്ധപ്പെട്ട വിഷയത്തില് സുപ്രീം കോടതിയില് റിവ്യൂ പെറ്റീഷന് നല്കുമെന്ന് സംസ്ഥാന സര്ക്കാര് പറയുന്നുണ്ടെങ്കിലും ഇക്കാര്യത്തില് അദ്ധ്യാപക സംഘടനകള്ക്കു പുറമെ നിയമവിദഗ്ധരുമായും വിശദമായ ചര്ച്ച വേണ്ടിവരും. നടപടികള് വേഗത്തിലാക്കാന് വകുപ്പ് ഉദ്യോഗസ്ഥര്ക്ക് നിര്ദ്ദേശം നല്കിയിട്ടുണ്ടെന്നാണ് പൊതുവിദ്യാഭ്യാസ വകുപ്പ് മന്ത്രി പറയുന്നത്. സുപ്രീം കോടതി വിധിയുമായി ബന്ധപ്പെട്ട വിഷയങ്ങള് സംസ്ഥാന സര്ക്കാര് മരവിപ്പിക്കുന്നതെങ്ങിനെയെന്ന ചോദ്യം ബാക്കിയാണ്.
സര്ക്കാര്/എയിഡഡ് സ്കൂളുകളിലെ നിയമനങ്ങള്ക്കുള്ള കെ-ടെറ്റ് യോഗ്യതയുമായി ബന്ധപ്പെട്ട് പുറപ്പെടുവിച്ച പുതിയ നിര്ദ്ദേശങ്ങള് നടപ്പിലാക്കുന്നത്, കൂടുതല് വ്യക്തത ആവശ്യമായതിനാല്, ഇനിയൊരു ഉത്തരവ് ഉണ്ടാകുന്നതുവരെ മരവിപ്പിച്ചതായി മന്ത്രി കഴിഞ്ഞദിവസം അറിയിച്ചിരുന്നു.
2010 ഏപ്രില് 1ന് മുന്പ് സര്വീസില് പ്രവേശിച്ച അധ്യാപകരും കെ.ടെറ്റ് പാസാകണമെന്നാണ് നിലവിലെ സുപ്രീം കോടതി വിധി. ഈ വിധിക്കെതിരെയാണ് റിവ്യൂ പെറ്റീഷന് ഫയല് ചെയ്യുമെന്ന് സര്ക്കാര് പറയുന്നത്. കെ-ടെറ്റ് പരീക്ഷ കേരളത്തില് ആരംഭിച്ചത് 2012-ല് മാത്രമാണ്.
നിലവില് യോഗ്യത നേടാന് ആഗ്രഹിക്കുന്നവര്ക്കായി 2026 ഫെബ്രുവരിയില് കെ-ടെറ്റ് പരീക്ഷ നടത്തുന്നതിന് വിജ്ഞാപനം പുറപ്പെടുവിച്ചിട്ടുണ്ട്.
